![](img/news/32/37/47/default.jpg)
Թուրք-ադրբեջանական՝ մեկ ազգ-երկու պետություն բանաձեւը իրական գործոն է, եւ ովքեր մինչ օրս լիովին չեն ընկալել այդ բանաձեւի քաղաքական էությունը, ուրեմն կարեւոր մի բան բաց են թողել իրենց հաշվարկներում: Այս մասին, այսօր՝ ապրիլի 23-ին, Կարեն Դեմիրճյանի անվան մարզահամերգային համալիրում ընթացող «Ընդդեմ ցեղասպանության հանցագործության» երկրորդ գլոբալ համաժողովի նիստերի միջեւ նախատեսված ընդմիջմանը համաժողովի պատվիրակների հետ շփումների ժամանակ նշել է ՀՀ նախագահ Սերժ Սարգսյանը:
Նախագահի մամուլի գրասենյակից NEWS.am-ին հայտնում են, որ մեր երկրի աշխարհագրական դիրքով պայմանավորված դժվարությունների թեմայի շուրջ խոսելիս նախագահը, մասնավորապես, ասել է. «Այո՛, Հայաստանի չորս հարեւաններից երկուսը մեր երկրի նկատմամբ վարում են թշնամական քաղաքականություն: Չնայած դրան՝ անկախության հռչակումից ի վեր մենք որդեգրել ենք բազմավեկտոր քաղաքականություն՝ փորձելով հարաբերություններ զարգացնել մեր բոլոր հարեւանների հետ: Անգամ Թուրքիայի հետ առանց նախապայմանների հարաբերությունների վերականգնման նախաձեռնողը մենք էինք, նախաձեռնություն, որի արդյունքում աշխարհը տեսավ, թե ինչու է իրականում փակ հայ-թուրքական սահմանը, ով է նախապայման դնողն ու ինչպիսի իրական գործոն է թուրք-ադրբեջանական՝ մեկ ազգ-երկու պետություն բանաձեւը: Իսկ ովքեր մինչ օրս լիովին չեն ընկալել այդ բանաձեւի քաղաքական էությունը, ուրեմն կարեւոր մի բան բաց են թողել իրենց հաշվարկներում:
Մենք խաղաղասեր ժողովուրդ ենք. մենք ոչ ոքի չենք ատում եւ մեր հարաբերությունները որեւէ մեկի հետ թշնամանքի ու ատելության վրա չենք կառուցում: Մեր ժողովուրդը կռվել չի սիրում եւ կռվում է միայն այն ժամանակ, երբ իրեն դա պարտադրում են: Իսկ պարտադրում են այն բանի համար, որ ընդամենն ուզում է սեփական հողի վրա կառուցել սեփական ապագան եւ ապրել ազատության պայմաններում»: