Հալաբյանի փողոցում ավտոբուսի պայթյունից տուժած հղի կնոջը՝ 37-ամյա Անուշ Եղիկյանին տեղափոխեցին Պերինատոլոգիայի, մանկաբարձության եւ գինեկոլոգիայի ինստիտուտ:
NEWS.am-ի թղթակցի հետ զրույցում Անուշի մայրը՝ Մարգարիտա Եղիկյանը նշեց, որ դեպքից 10 րոպե առաջ զրուցել է դստեր հետ:
«Ասեց՝ մամ, ատամնատեխնիկի մոտից դուրս ենք գալիս: 10 րոպե հետո հեռուստացույցը միացրեցի, տեսա վթարը: Ասացին, որ մեջը հղի կին կա, ինձնից անկախ մտածեի, որ իմ երեխան է»,- նշեց նա:
Մարգարիտա Եղիկյանը Նոյեմբերյանում է ապրում եւ այսօր առավոտյան շտապել է Երեւան՝ դստեր մոտ: Նրան թույլ են տվել մի պահ տեսնել աղջկան:
Նա նշեց, որ դուստրը 37 տարեկան է, սա նրա երկրորդ հղիություն է, ունի 6 տարեկան երեխա, ու հիմա 15-շաբաթական հղի է:
Նշենք, որ պայթյունը տեղի է ունեցել Հալաբյան փողոցի թիվ 11 շենքի մոտ, թիվ 63 երթուղու «Բոգդան» մակնիշի ավտոբուսում։ Պայթյունն այնքան ուժգին է եղել, որ լսվել է մի քանի կիլոմետրից, հարեւան շենքերում ապակիներ են կոտրվել։
Ապրիլի 26-ի, ժամը 04.20-ի դրությամբ կա 8 տուժած՝ 1963 թ. ծնված Հասմիկ Սուրենի Մելքոնյան, 1979 թ. ծնված Անուշ Արշալույսի Եղիկյան, 1971 թ. ծնված Հարություն Նազարի Թերզյան, 2002 թ. ծնված Էդգար Արայիկի Գասպարյան, 2001 թ. ծնված Անահիտ Սարգսի Միքայելյան, 2001 թ. ծնված Ռոլանդ Սուրիկի Խոջայան, 1955 թ. ծնված Արեգնազ Սարգսի Ղալեչյան, 1994 թ. ծնված Արթուր Վաչիկի Մարգարյան, ով տեղափոխվել է «Ճառագայթային բժշկության եւ այրվածքների գիտական կենտրոն», որտեղ ստանալով համապատասխան բուժօգնություն՝ դուրս է գրվել: Տուժածները ՀՀ քաղաքացիներ են:
Կան 2 զոհ, որոնց ից մեկի ինքնությունը հայտնի է, մյուսի ինքնությունը ճշտվում է:
Տուժածները տեղափոխվել են «Արմենիա» ՀԲԿ, որտեղ բժիշկները Էդգար Արայիկի Գասպարյանի եւ Ռոլանդ Սուրենի Խոջայանի առողջական վիճակը գնահատել են ծանր, Անահիտ Սարգսի Միքայելյանինը՝ բավարար, իսկ մյուսներինը` միջին ծանրության:
Փաստի առթիվ ՀՀ քրեական օրենսգրքի 279-րդ հոդվածի 3-րդ մասի հատկանիշներով (Սպառողների կյանքի կամ առողջության անվտանգության պահանջներին չհամապատասխանող ծառայություններ մատուցելը, եթե այդ արարքներն անզգուշությամբ առաջացրել են երկու կամ ավելի անձանց մահ) հարուցվել է քրեական գործ, որը գտնվում է ՀՀ ՔԿ ՀԿԳ քննության վարչության վարույթում: