Թուրքիայի արտգործնախարար Ահմեդ Դավութօղլուն Հարվարդի համալսարանի կառավարման դպրոցում ունեցած ելույթի ընթացքում խոսել է Գազայի հատված մարդասիրական օգնություն տանող նավերի վրա Իսրայելի գործողությունների մասին։

Թուրքական Mynethaber-ի փոխանցմամբ՝  Դավութօղլուն պատասխանել է Իսրայելի կողմից թուրքական Mavi Marmara-ի դեմ իրականացված գործողություններից հետո թուրք հասարակության տեսակետների հետ կապված հարցին՝ նշելով. «Եթե ժողովրդավարական երկիր եք, ստիպված եք ընդունել հասարակության եւ բացասական եւ դրական արձագանքները։ Մենք էլ մեր հասարակության զգացմունքներից կտրված չենք։  Mavi Marmara-ի դեմ իսրայելական գործողությունը թուրք հասարակության մեջ բացասական արձագանքներ գտած իրադարձություն է։ Բայց, հասարակությունն ինչ էլ մտածի, քաղաքացիների պաշտպանությունը՝ պետության խնդիրն է»։

Ըստ Դավութօղլուի՝ Թուրքիայի հանրապետության պատմության մեջ առաջին անգամ կանոնավոր բանակը սպանեց Թուրքիայի քաղաքացիների։ «Դա, իհարկե, թուրք հասարակության մեջ մեծ արձագանք ունեցավ, քանի որ մենք Իսրայելի հետ պատերազմական իրավիճակում չէինք։ Այդ նավը չէր խախտել իսրայելական սահմանը, ոչ էլ իսրայելցիների էր վնաս հասցրել»-նշել է Դավութօղլուն՝ հավելելով, որ իրենք փորձել են այդ ամենը լուծել իրավական տեսանկյունից։