Հայաստանը պետք է ճանաչի Լեռնային Ղարաբաղի Հանրապետությունը: Այս մասին NEWS.am-ի թղթակցի հետ զրույցում հայտարարեց Արտաքին քաղաքականության եւ անվտանգության հարցերով ԼՂՀ Հանրային խորհրդի նախագահ, ԼՂՀ ԱԳ նախարարի նախկին տեղակալ Մասիս Մայիլյանը:
Անդրադառնալով Հայաստանի կառավարություն ներկայացված «Արցախի Հանրապետությունը ճանաչելու մասին» օրենքի նախագծին՝ Մայիլյանը նշեց. «Ես վաղուց եմ կարծում, որ Հայաստանը պետք է ճանաչի Լեռնային Ղարաբաղի Հանրապետությունը: Հիմա իրավիճակը փոխվել է, եւ քաղաքական գործիչները փոխել են նախկին մոտեցումները: Նախկինում Երեւանում կարծում էին, որ ճանաչումը կհանգեցնի պատերազմի կամ խաղաղ բանակցային գործընթացի խափանման: Բայց կյանքը ցույց տվեց, որ առանց այդ ճանաչման էլ Ադրբեջանը պատերազմ սկսեց եւ խափանեց բանակցային գործընթացը, ինչպես նաեւ խախտեց 1994 թվականի հրադադարի մասին համաձայնագիրը»:
Հիմա, ըստ դիվանագետի, այլեւս այդ հարցում որեւէ մտահոգություն չի լինի, եւ Հայաստանը պետք է ավելի կտրուկ քայլեր ձեռնարկի:
Հիշեցնենք, որ Հայաստանի կառավարությունը մայիսի 5-ին կքննարկի «Արցախի Հանրապետությունը ճանաչելու մասին» օրենքի նախագիծը, որը ներկայացրել են պատգամավորներ Զարուհի Փոստանջյանն ու Հրանտ Բագրատյանը: