«Մայքրոսոֆթ»-ի ներկայացուցիչը ՀՀ ոստիկանությանը ներկայացրել է Government Security Program ծրագիրը: Մայիսի 5-ին ոստիկանության պետի տեղակալ Վարդան Եղիազարյանն ընդունեց «Մայքրոսոֆթ» ընկերության կիբերանվտանգության հարցերով տարածաշրջանային տնօրեն Ռոբերտ Կոսլային եւ Մայքրոսոֆթի հայաստանյան գրասենյակի տնօրեն Լիանա Կորկոտյանին:
Ոստիկանության մամուլի ծառայությունից NEWS.am-ին հայտնում են, որ Ռոբերտ Կոսլան ներկայացրեց ՀՀ ոստիկանության հետ համագործակցության իր տեսլականը, մասնավորապես նշելով թվային տեխնոլոգիաների արդիականացման, գործընթացների ավտոմատացման, կիբերհանցավորության, ահաբեկչության դեմ պայքարը եւ այլ ոլորտներ:
Ներկայացվեց նաեւ Government Security Program(GSP) ծրագիրը, որին ինտեգրվելը իրավապահ մարմիններին թույլ է տալիս օգտագործել կիբերհանցավորության դեմ պայքարի մի շարք նոր գործիքներ: Վ.Եղիազարյանը, ընդգծելով համագործակցությունը սերտացնելու անհրաժեշտությունը, առաջարկեց երկուստեք միջոցներ ձեռնարկել համագործակցության ոլորտներն առավել հստակ եւ առարկայական դարձնելու նպատակով:
