Ընտրական օրենսգրքի հետ կապված Դաշնակցությունը ԵԽԽՎ մոնիտորինգի խմբին հայտնել է, որ իրենց առաջարկներն ընդունվել են եւ լայն կոնսենսուսի հասնելու հնարավորություն կա: Այս մասին Ազգային ժողովում ԵԽԽՎ մոնիտորինգի խմբի հետ հանդիպումից հետո լրագրողների հետ զրույցում հայտնել է ՀՅԴ խմբակցության ղեկավար Արմեն Ռուստամյանը:
«Հիմա կա հնարավորություն լայն կոնսենսուսի հասնելու: 4+4+4 ձեւաչափով աշխատել ենք եւ կարծում եմ՝ կա իսկապես հնարավորություն ունենալ Ընտրական մի օրենսգիրք, որը կբավարարի կողմերին: Դրա համար շատ կարեւոր է Եվրոպայի խորհրդի քաջալերումը այս պրոցեսին»,-ասաց Ռուստամյանը:
Նա նշեց, որ անդրադարձել են Արցախում կատարվող իրադարձություններին. «Ասել ենք, որ այս ամբողջ պրոցեսի վրա ազդում է նաեւ այս իրավիճակը, մի կողմից բարեփոխումներ անել, մյուս կողմից պատերազմական գործողություններ իրականացնելը որեւէ երկրի համար մեծ փորձություն է, ուր մնաց Հայաստանի, որի ներսում չափազանց շատ խնդիրներ են կուտակված: Դժվար է թե ճակատը պահել, թե ներսում փոփոխություններ իրականացնել: Մենք առաջարկեցինք, որ իրենք առիթ ստեղծեն ու այցելեն Արցախ, բայց եթե չեն էլ այցելում գոնե հստակ գնահատեն՝ ով սկսեց նոր պատերազմը եւ դրա համար փաստերը ակնառու են: Պետք չի, որ իրենք ազդվեն Ադրբեջանի քարոզչությամբ ու չհասցեավորված պատասխաններ տան»,-նշեց Ռուստամյանը:
Ըստ ՀՅԴ ներկայացուցչի՝ մոնիտորինգի խումբը կարեւորում է, որ լայն կոնսենսուս տեղի ունենա Ընտրական օրենսգրքի հետ կապված: Իսկ Արցախի մասով ասել են, որ չեն այցելի հիմա, բայց օրակարգում պետք է պահեն հարցն ու այցելեն հետո. «Ասել են՝ պետք է համապատասխան տեղեկությունը կատարվածի հետ կապված ունենան ու կանխեն պատերազմական գործողությունները: Ընդունում են, որ այստեղ լուրջ անելիք ունի Եվորպայի խորհուրդը»,-ասաց Ռուստամյանը:
Հարցին, թե ինչ է նկատի ունեցել՝ ասելով, որ Ընտրական օրենսգրքի շուրջ կոնսենսուսի լայն հնարավորություն կա, մինչդեռ ՀԱԿ-ը պնդում է, որ չկա, ՀՅԴ խմբակցության ղեկավարը պատասխանեց. «Դե հիմա 4+4+4 ձեւաչափով քննարկումներին մասնակցած ուժերը հայտարարության տեքստ են պատրաստում, դրան ես ծանոթ եմ: Եթե այդ հայտարարությունը չընդունեն, թող հասարակությունը որոշի ով մերժեց: Այն ինչ որ մենք տեսել ենք, ըստ էության այն բոլոր 5 պահանջները, որ ներկայացրել էին, բավարարված են: Մենք պնդում ենք, որ հրապարակվի այդ փաստաթուղթը, իսկ ով որ չի միանում, թող հայտարարի՝ ինչու չեն միացել»:
Նշենք, որ Եվրոպայի խորհրդի խորհրդարանական վեհաժողովի հայաստանյան համազեկուցողներ Ալան Միլը եւ Ջուզեպպե Գալատինն հանդիպումների շարք են ունեցել Ազգային ժողովի խմբակցությունների հետ:
Համազեկուցողները Հայաստան են ժամանել դիտարկելու Սահմանադրական փոփոխություններից հետո «Ընտրական օրենսգրքի» մշակման եւ ընդունման գործընթացը: Նրանք դիտարկելու են սահմանադրական փոփոխություններից հետո Ընտրական օրենսգրքի բարեփոխումների եւ կոռուպցիայի դեմ պայքարի ընթացքը: Համազեկուցողներն այդ նպատակով այսօր հանդիպելու են նաեւ ԵԽԽՎ-ում ՀՀ պատվիրակության անդամների հետ: