Ամերիկայի հայ դատի հանձնախումբը մայիսի 27-ին կոնգրեսական առաջնորդներին կոչ է արել կրկնապատկել իրենց ջանքերը եւ համոզելւ Օբամայի վարչակազմին՝ ապահովել ապրիլի 2-ի ադրբեջանական ագրեսիայի հետեւանքներից բխող՝ Ռոյսի եւ Էնգելի առաջարկների իրականացումը՝ պատշաճ եւ ժամանակին:
Հայ դատի հանձնախմբի նախագահ Րաֆֆի Համփարյանը հանդիպել է ԱՄՆ կոնգրեսի Ներկայացուցիչների պալատի Արտաքին հարաբերությունների հանձնաժողովի նախագահ Էդ Ռոյսի հետ, որը կոնգրեսական Էլիոթ Էնգելի հետ միասին հեղինակել է Արցախի վերաբերյալ առաջարկները:
Հանդիպմանը քննարկվել են Ալիեւի ռեժիմի ագրեսիան Արցախի դեմ, որն ամենալայնածավալն էր 22 տարվա մեջ, նաեւ Ադրբեջանի ռազմական հանցագործությունները, այդ թվում՝ տարեց բնակիչների դաժան սպանությունը եւ երեք հայ զինվորների գլխատումը:
Կոնգրեսականներ Բրեդ Շերմանը եւ Լորետա Սանչեզը միացել են «Լիհիի օրենքի» շրջանակում հետաքննություն սկսելու եւ ռազմական հանցագործություններ իրականացնող Ադրբեջանին ռազմական աջակցությունից զրկելու ՝ Հայ դատի հանձնախմբի կոչին:
Ավելի վաղ կոնգրեսականներ Ռոյսն ու Էնգելը հանդես էին եկել մի շարք առաջարկություններով, որոնք ուղղված են շփման գծում լարվածության թուլացմանը: Մասնավորապես, նրանք առաջարկում էին առաջնագծից հեռացնել դիպուկահարներին, հատուկ սարքավորումներ տեղադրել հրադադարի ռեժիմը խախտող հարձակումների աղբյուրները պարզելու համար, նաեւ ապահովել ԵԱՀԿ դիտորդների ներկայությունը՝ ավելի արդյունավետ հսկողության համար: