Մենաշնորհը հակաօրինական, հակասահմանադրական երեւույթ չի, որ մենք փորձենք պայքարել մենաշնորհի դեմ: Այս մասին NEWS.am-ի հետ զրույցում ասաց ՀՀԿ խմբակցության պատգամավոր Սամվել Նիկոյանն` անդրադառնալով էկոնոմիկայի նախարար Արծվիկ Մինասյանի`մենաշնորհը օրինականացնելու առաջարկին:
«Ամբողջ աշխարհում որեւէ ապրանքային շուկայի մենաշնորհի դեմ պայքարը չի նշանակում գործարարի դեմ պայքար, սկսենք սրանից, բայց ամենակարեւորն այն է, որ տնտեսության մեջ մրցակցային պաշտպանության մեխանիզմների կատարելագործումը հստակ պաշտպանվի: Այսինքն, յուրաքանչյուր գործարար իրավունք եւ հնարավորություն ունենա զբաղվել այնպիսի գործունեությամբ, որը նպատակահարմար է գտնում: Եթե դա լիներ մեր տնտեսությունը շատ ավելի բարվոք վիճակում կլիներ, կունենայինք կայացած միջին խավ »,-ասաց Նիկոյանը:
Ըստ պատգամավորի` եթե այդ ուղղությամբ արդեն իսկ կա մտահոգություն, գաղափարներ են հնչում, փորձ է արվում քայլեր կատարել արդեն իսկ ողջունելի է: «Օրենքով, թե ոչ օրենքով փաստը մնում է փաստ, որ շաքարավաղի ոլորտում մենաշնորհը Սամվել Ամեքսանյանինն է, խնդիրն այն է, թե ինչ պետք է անի կառավարությունը. կառավարության գործիքակազմն էլ օրենքով թույլատրված շրջանակում պետք է իր գործողությունն իրականացնի: ժամանակի ընթացքում առաջացել է այնպիսի իրավիճակ, որ ինքը հայտնվել է մրցակցությունից դուրս, հիմա եթե որեւիցէ մեկը փորձի ներկրել շաքարավազ, կհայտնվի անհավասար դաշտում, որովհետեւ ամբողջ ինֆրաստրուկտուրան արդեն մեկ ընկերության ձեռքում է, կարող է ներմուծել խոշոր ծավալով , որը եւ տրանսպորտային, եւ գնումների ինքնարժեք Վրա կարող է ազդել եւ իր մոտ վաճառքի գինն ավելի էժան ստացվի, քան մյուսը: Բնական ճանապարհով տնտեսական գործունեության արդյունքում ստեղծվել է նման իրավիճակ»:
Ըստ Նիկոյանի` Արծվիկ Մինասյանի առաջարկի մեջ հետեւյալ տրամաբանությունն է. «Եթե որեւէ մեկի գործունեությունը ճանաչվում է մենաշնորհ, ապա այստեղ կարող է նրա նկատմամբ սակագնային քաղաքականություն իրականացվել: Այսինքն` եթե քեզ ճանաչում ենք այդպիսին , մենք պետք է հաշվենք սակագինը, ինչպես հոսանքի սակագինը, որը բնական մենաշնորհ է, Մինասյանի առաջարկը վերաբերում է նրան, որ ստեղծված իրավիճակում ապրանքային շուկայում որեւէ մոնոպոլիստի գործունեությունը լինի օրենքով կանոնակարգելի»:
