Այժմ Ադրբեջանն անհամեմատ ավելի կոշտ դիրքորոշում ունի, քան 10 տարի առաջ, եւ այդ դիրքորոշումը գնալով ավելի է կոշտանում: Այդ մասին հունիսի 1-ի մամուլի ասուլիսին հայտնել է «Մոդուս Վիվենդի» վերլուծական կենտրոնի ղեկավար, փորձագետ Արա Պապյանը:
Նրա խոսքով, հայկական եւ ադրբեջանական կողմերի ինչ-որ հանդիպում կարող է տեղի ունենալ, բայց Ադրբեջանի դիրքորոշումն անփոփոխ կմնա: «Ինչ վերաբերում է բանակցային գործընթացին, ցավոք սրտի, այն լիովին անարդյունավետ է, որովհետեւ Ադրբեջանը հարցի ռազմական լուծման նպատակ է դրել: Վիեննայի հանդիպման ընթացքում միակ առաջընթացը միջադեպերի հետաքննության մեխանիզմների ստեղծման մասին խոսակցությունն է: Իսկ նման հայտարարություններն առայժմ առաջընթացի մասին չեն խոսում», - նշել է Արա Պապյանը: Ադրբեջանին, ընդգծել է նա, կարելի է խաղաղություն պարտադրել միայն եթե ամրապնդենք տնտեսությունը, վերջ դնենք կառուպցիային, կարգի բերենք բանակը, որպեսզի Ադրբեջանը հասկանա, որ ինքը հարձակման դեպքում հաջողության շանսեր չունի:
