![](img/news/33/00/33/default.jpg)
Ազատության հրապարակում Ամանորի գիշերը ոստիկանի նկատմամբ բռնություն կիրառելու մեջ մեղադրվող ակտիվիստ Գեւորգ Սաֆարյանն այսօր` հունիսի 1-ին, Կենտրոն եւ Նորք Մարաշ վարչական շրջանների ընդհանուր իրավասության դատարանում չընդունեց իրեն առաջադրված մեղադրանքը:
«Միանշանակ չեմ ընդունում: Ես համարում եմ, որ սա քաղաքական հետապնդում է իմ նկատմամաբ: Սա քաղաքական գործ է, իրավաբանության հետ կապ չունի»,- հայտարարեց Գեւորգ Սաֆարյանը:
Գեւորգ Սաֆարյանը նշեց նաեւ, որ առաջադրված մեղադրանքն իրեն հասկանալի չէ:
«Ինձ պարզ չէ` ինչ է նշանակում հրահրված միջադեպ, ինչ ծառայություններ էր կատարում ոստիկանությունը, դուրս է եկել իր լիազորություններից, թե ոչ»,- ասաց նա:
Նշենք, որ դատական նիստերի դահլիճում էին Գեւորգ Սաֆարյանի ընկերները, որոնք նրան ծափահարություններով դիմավորեցին:
Գեւորգ Սաֆարյանին մեղադրանք է առաջադրվել Քրեական օրենսգրքի 316-րդ հոդվածի 1-ին մասով՝ Իշխանության ներկայացուցչի նկատմամբ բռնություն գործադրելը։
Հիշեցնենք, որ Երեւանի Ազատության հրապարակում 2016թ. հունվարի 1-ին ընդդիմադիր «Նոր Հայաստանի» անդամների եւ ոստիկանների միջեւ բախումներ էին տեղի ունեցել: Պատճառը տոնածառի հագուստով մայրաքաղաքի փողոցներում շրջող ակտիվիստն էր: Երեք անձ բերման էր ենթարկել, այդ թվում՝ Գեւորգ Սաֆարյանը, որին հետագայում էլ կալանավորեցին:
Ըստ իրավապահ մարմինների` Գեւորգ Սաֆարյանը բռնություն է գործադրել Ոստիկանության 4-րդ հատուկ գումարտակի հրամանատար, ոստիկանության կապիտան Գեղամ Խաչատրյանի նկատմամբ: