Ադրբեջանի համար Ղարաբաղի խնդիրը տարածքի հարց է, Ղարաբաղի հայերի համար՝ դա կյանքի իրավունքի հարց է: Այս մասին հունիսի 1-ին՝ «Ղարաբաղյան հակամարտության ռուսական միջնորդության հեռանկարները» թեմայով Երեւան-Բաքու-Մոսկվա հեռուստակամուրջի ժամանակ, ասել է ՀՀԿ պատգամավոր Խոսրով Հարությունյանը:
Նրա խոսքով՝ Ռուսաստանի միջնորդությունը ընդունելի է Հայաստանի եւ Ադրբեջանի համար: «Ռուսաստանը ջանքեր է գործադրել հավասարակշռությունը պահպանելու համար, սակայն դա, պարզվեց, քիչ է: Անհրաժեշտ է հասկանալ բուն հակամարտության էությունը: Ադրբեջանի համար խնդիրը տարածքները վերադարձնելն է: Նրանց համար դա տարածքի հարց է, իսկ Ղարաբաղի հայերի համար դա կյանքի իրավունքի հարց է», - ընդգծել է Հարությունյանը:
Նա նշեց, որ բոլորը գիտեն, թե ով է սրում իրավիճակը, սակայն եղած հայտարարությունները չեն համապատասխանում դրան: «Ապրիլի ռազմական գործողությունները լավ հիմք են, որպեսզի բոլորը վերանայեն իրենց գործունեությունը, այդ թվում՝ Ռուսաստանը», - ասել է ՀՀԿ պատգամավորը:
