Ադրբեջանը պետք է կառուցողական քայլեր ձեռնարկի՝ ճանաչի Լեռնային Ղարաբաղի Հանրապետությունը եւ նստի նրա հետ բանակցությունների սեղանի շուրջ: Այս մասին հունիսի 1-ին՝ «Ղարաբաղյան հակամարտության ռուսական միջնորդության հեռանկարները» թեմայով Երեւան-Բաքու-Մոսկվա հեռուստակամուրջի ժամանակ, ասել է «Ժառանգություն» խմբակցության քարտուղար, ԱԺ պատգամավոր Թեւան Պողոսյանը:
Նա հիշեցրել է, որ 1991-ի սեպտեմբերի 2-ին ԼՂՀ-ն հռչակել է իր անկախությունը: 25 տարի անց կա կայացած պետություն, որը 2 պատերազմական արշավ է հաղթել՝ 1991-1994թթ. եւ 2016-ի ապրիլի 2-5-ը: «Ես կոչ կանեի, որ ադրբեջանական պատվիրակության անդամները սեպտեմբերի 2-ին գային Ստեփանակերտ եւ շնորհավորեին Ղարաբաղի հայերին անկախության 25-ամյակի կապակցությամբ, որպեսզի ադրբեջանական կողմը չսպաներ զինծառայողներին, չխեղեր մարդկանց ճակատագրերը, այլ կառուցողական մոտեցում ցուցաբերեր»,- ընդգծել է Թեւան Պողոսյանը:
Դրան ի պատասխան՝ հեռուստակամուրջի մեկի այլ մասնակից, ադրբեջանցի քաղաքագետ, Բաքվի մուլտիկուլտուրալիզմի միջազգային կենտրոնի խորհրդական Թոֆիկ Աբասովը բավական ագրեսիվ հայտարարեց, որ շնորհավորանք անպայման կլինի, սակայն «համապատասխան ձեւով»:
