Հռոմի Ֆրանցիսկոս պապն ուրբաթ օրը եռօրյա այցով կմեկնի Հայաստան, որի շրջանակում նա մտադիր է անցելել Հայոց ցեղասպանության զոհերի հուշահամալիր եւ հարգանքի տուրք մատուցել Օսմանյան Թուրքիայում 1915-ին սպանված հայերի հիշատակին: Շատ հնարավոր է, որ դա նորից կսրի Վատիկանի եւ Անկարայի միջեւ հարաբերությունները, գրում է The Wall Street Journal-ը:
Հռոմի պապի այցը տեղի է ունենալու Կովկասյան տարածաշրջանի համար լարված ժամանակաշրջանում, ինչը պայմանավորված է ապրիլին ղարաբաղյան հակամարտության գոտում բռնության հերթական բռնկումով:
Ծիծեռնակաբերդի հուշահամալիր կատարելիք այցին առնչվող հիմնական հարցն այն է, արդյոք Հռոմի պապը կկրկնի «20-րդ դարի առաջին ցեղասպանության մասին» խոսքերը, որոնք անցած տարի էր ասել՝ Ցեղասպանության 100-րդ տարելիցի կապակցությամբ:
2015 թվականին Սուրբ Պետրոսի տաճարում հնչած այդ խոսքից հետո Թուրքիան անմիջապես հետ էր կանչել Վատիկանում իր դեսպանին: Դեսպանը վերադարձել էր Վատիկան միայն 10 ամիս անց: Թուրքիայի նախագահ Ռեջեփ Թայիփ Էրդողանն էլ դատապարտեց Պապի հայտարարությունը՝ նախազգուշացրելով, որ նա այլեւս «չկրկնի այդ սխալը»:
«Ցեղասպանություն» բառը օգտագործել է նաեւ Սուրբ Հովհաննես Պողոս II-ն 2001 թվականին Հայաստան այցի ժամանակ: Բայց Ֆրանցիսկոս պապն է՛լ ավելի հեռուն գնաց՝ ասելով որ այդ ցեղասպանությունը 20-րդ դարի «երեք մեծ եւ աննախադեպ ողբերգություններից մեկն է»։
Պապի այցելության ենթատեքստում կլինի նաեւ Հայաստանի եւ Ադրբեջանի միջեւ լարվածությունը: Վերջին տասնամյակների ամենաուժեղ բախումները տեղի ունեցան այս տարվա ապրիլին, երբ ադրբեջանական ուժերը հարձակվեցին հայկական դիրքերի վրա՝ փորձելով գրավել ռազմավարական բարձունքներ, գրում է թերթը՝ հիշեցնելով, որ երկուշաբթի օրը ՌԴ նախագահ Վլադիմիր Պուտինի միջնորդությամբ Հայաստանի եւ Ադրբեջանի նախագահները հանդիպել են Սանկտ Պետերբուրգում: Հռոմի պապն Ադրբեջան կայցելի ավելի ուշ՝ հոկտեմբերին: Նույն օրերին նա կայցելի նաեւ Վրաստան։
Կիրակի օրը Հայաստանից մեկնելուց առաջ Ֆրանցիսկոս պապն աղոթելու է Խոր Վիրապ վանքում, որը գտնվում է Թուրքիայի հետ փակ սահմանի մոտ եւ որտեղից երեւում է Արարատ լեռը:
Հռոմի պապի օրակարգում չկա այցելություն հայ-թուրքական սահման, սակայն դա բառառված չէ, քանի որ Ֆրանցիսկոսը սիրում է զարմացնել իր չծրագրված արարքներով: 2014 թվականին Սուրբ Երկիր այցելության ժամանակ Ֆրանցիսկոս պապը չնախատեսված կանգառ է արել Արեւմտյան ափին՝ Իսրայելի բաժանիչ արգելապատնեշի մոտ եւ աղոթել այնտեղ:
Եթե Ֆրանցիսկոս պապը, այնուամենայնիվ, գնա Թուրքիայի հետ սահման, դա անկասկած կհայտնվի միջազգային լրատվամիջոցների ուշադրության կենտրոնում: