Հայաստանի, Բելառուսի, Ղազախստանի, Ղրղզստանի, Ռուսաստանի եւ Տաջիկստանի կենտրոնական բանկերը քննարկել են բանկային համակարգերի զարգացումը եւ համագործակցությունը, ուրբաթ հայտնել է բելառուսական կարգավորիչը, տեղեկացնում է «ՌԻԱ Նովոստին»:
«Մի շարք այժմեական հարցեր են քննարկվել 2016-ի հունիսի 24-ին Հայաստանի, Բելառուսի, Ղազախստանի, Ղրղզստանի, Ռուսաստանի եւ Տաջիկստանի կենտրոնական (ազգային) բանկերի ղեկավարների խորհրդի 34-րդ նիստի ընթացքում, որը տեղի է ունեցել Բրեստում Բելառուսի ազգային բանկի կառավարման փոխնախագահ Սերգեյ Կալեչիցայի նախագահությամբ», — ասված է հաղորդագրության մեջ: Նիստին մասնակցել են նաեւ Միջպետական բանկի ներկայացուցիչներ:
Ազգային բանկից հայտնել են, որ հանդիպման մասնակիցները տեղեկություններ են փոխանակել աշխատանքի արդյունքների եւ իրենց պետությունների բանկային համակարգերի զարգացման հեռանկարների, արժութային շուկաների զարգացման միտումների, վճարային հաշվեկշիռների վիճակի եւ միջազգային պահուստների դինամիկայի վերաբերյալ:
«Քննարկվել են նաեւ վճարման քարտերի շուկայի ենթակառուցվածքների զարգացման վերաբերյալ տեղեկությունների եւ փորձի փոխանակման, անձնական եւ անդրսահմանային դրամական փոխանցումների ցուցանիշների հաշվարկին մեթոդական մոտեցումների ոլորտում կենտրոնական բանկերի փոխգործակցության, անձնակազմի ուսուցման հարցերում համագործակցության հետագա զարգացմանը վերաբերող հարցեր», — ասված է կարգավորիչ հաղորդագրության մեջ: