Ռուսաստանի հետ համատեղ Հակաօդային պաշտպանության համաձայնագրի դեմ «Մենք ենք տերը մեր երկրի» նախաձեռնության կազմակերպած բողոքի ակցիայի ժամանակ այսօր՝ հունիսի 27-ին, ԱԺ հետնամուտքի մոտ ցուցարարներից մեկը շիշ է նետել ԱԺ պատգամավոր Հրանտ Բագրատյանի ուղղությամբ:
Ոստիկանությունը բերման ենթարկեց տղամարդուն, որը շիշ էր նետել: Դրանից հետո Հրանտ Բագրատյանի ու մյուս ակտիվիստների միջեւ վեճ սկսվեց:
«Այ ընկեր, ես դեմ եմ դրան, արա, ինչ եք խոսում: Դու խոսում ես մի մարդու հետ, որը էդ ՀՕՊ-ը ստեղծել է, ես ինչ անեմ, 5 հոգի ենք մենք ստեղ: Եթե լավ տղա ես, քաշեիր մի կողմ, ասեիր՝ ինչ ես խոսում: Կանգնում, մարդուն վիրավորում է»,- ակցիայի մասնակիցներին ասաց Հրանտ Բագրատյանը՝ նշելով, որ տղամարդն իր հետ լավ տոնով չի խոսել:
Ոստիկանությունից NEWS.am-ին հայտնեցին, որ տղամարդը բերման է ենթարկվել մարմնական վնասվածք հասցնելու կասկածանքով:
Հետնամուքից դուրս եկող ՀՀԿ-ական պատգամավորներին ցուցարարները դիմավորում էին «դավաճան, դավաճան» վանկարկումներով:
Նշենք, որ Ռուսաստանի հետ համատեղ Հակաօդային պաշտպանության համաձայնագրի վավերացման հարցն ընդգրկված է ԱԺ արտահերթ նստաշրջանի օրակարգում:
Հունիսի 3-ին ՀՀ ԱԺ արտաքին հարաբերությունների մշտական հանձնաժողովի նիստում քննարկվել է 2015թ. դեկտեմբերին ստորագրված «ՀՀ եւ ՌԴ միջեւ Հավաքական անվտանգության կովկասյան տարածաշրջանում ՀՕՊ միավորված տարածաշրջանային համակարգ ստեղծելու մասին» համաձայնագիրը: Այն դրական եզրակացությամբ ընդգրկվել է ԱԺ նիստերի օրակարգում՝ վավերացման համար:
Այս համաձայնագիրը հակազդեցություն է առաջացրել որոշակի քաղաքական ու քաղաքացիական շրջանակների կողմից, որոնք նշում են, որ սրանով Հայաստանը Ռուսաստանին է զիջում նաեւ իր օդային տարածքն ու անվտանգությունը: Նշվում է, որ ըստ այդ համաձայնագրի` ստեղծվելու է Հայկական հակաօդային պաշտպանությունը կարգավորող մի մարմին, որը կառավարվելու է Ռուսաստանի կողմից:
