Մանկապղծության մեջ մեղադրվող Հայր Դեմետրիոս Աթարյանը, որն այժմ պաշտոնավարում է Բրազիլիայում, հայ առաքելական եկեղեցու հետ որեւէ առնչություն չունի: Այս մասին NEWS.am-ի թղթակցին ասաց Բրազիլիայի հայկական թեմի առաջնորդ Տեր Նարեկ վարդապետ Բերբերյանը:
«Մամուլի հրապարակումներին ծանոթ եմ, սակայն այն հոգեւորականը, որի մասին խոսում եք, մեր թեմի հետ կապ չունի, առհասարակ հայ առաքելական եկեղեցու հետ առնչություն չունի»,- ասաց տեր Նարեկ վարդապետ Բերբերյանը:
Հիշեցնենք, որ այս տարվա փետրվարին հայ հոգեւորականները հայտնվել էին սկանդալի կենտրոնում. փետրվարի 29-ին Իսրայելի 10-րդ հեռուստաալիքի «Անցյալի դևերը» վերնագրով 15 րոպեանոց վավերագրական ֆիլմ էր ցուցադրել, որտեղ 38-ամյա Հրայր Եզեկելյանը պնդում էր, որ 2 տասնամյակ առաջ, երբ ինքը վարժարանի աշակերտ էր, 3 հայ հոգևորականներ իր հանդեպ սեռական ոտնձգություններ էին թույլ տվել: Եզեկելյանի պնդմամբ, այդ հոգեւորականներն են Հայր Խադ վարդապետ Ջունդուրյանը, Հույն ուղղափառ եկեղեցու Սան Պաուլուի համայնքում (Բրազիլիա) պաշտոնավարող Հայր Դեմետրիոս Աթարյանն ու վերջին տարիներին Ֆրանսիայում բնակված և մարտի 15-ին մահացած Դավիթ արքեպիսկոպոս Սահակյանը:
Երուսաղեմի Հայոց պատրիարք Տեր Նուրհան արքեպիսկոպոս Մանուկյանի և Տնօրեն ժողովի որոշմամբ ստեղծվել է հատուկ հանձնախումբ ներքին հետաքննություն կատարելու համար, սակայն առ այսօր որեւէ հայտարարությամբ հանդես չի եկել: Մայր Աթոռը նույնպես որեւէ հայտարարություն չի արել այս հրապարակումների վերաբերյալ: Ըստ Մայր Աթոռի մամլո դիվանի՝ իրենք դիմել են Երուսաղեմի թեմին՝ պարզաբանում ստանալու համար: Պատասխանը ստանալուց հետո Մայր Աթոռը հանդես կգա հայտարարությամբ:
