Google ընկերությունը եւ Ասիայի մի քանի օպերատոր ավարտել են Խաղաղ օվկիանոսի հատակով ԱՄՆ-ի եւ Ճապոնիայի միջեւ   FASTER ինտերնետային մալուխի անցկացումը, հայտնում է The Next Web-ը:

Մալուխի առավելագույն թողունակությունը հասնում է 60 Տբիթ/վ-ի: Google-ի ավագ փոխնախագահ Ուրա Խելցլեի խոսքով, մալուխի հզորությունը գերազանցում է աշխարհում ցանկացած այլ ստորջրյա մալուխի արագությունը:  

Ամերիկյան IT հսկան համատեղ նախագիծ է իրականացրել այնպիսի հեռահաղորդակցային ընկերությունների հետ, ինչպիսիք են China Mobile International-ը, China Telecom Global-ը, Global Transit-ը, KDDI-ն եւ SingTel-ը: Մալուխի նախագծման եւ անցկացման գործում օգնում է NEC ընկերությունը:

FASTER-ի շինարարական աշխատանքների արժեքը գնահատվում է 300 մլն դոլար: Նախագիծը մեկնարկել է մոտ մեկ տարի առաջ:

Մալուխը ամերիկյան Օրեգոնի նահանգը կապել է ճապոնական Տիբայի եւ Միի պրեֆեկտուրաների հետ: 

Նշվում է, որ դա Google-ի չորրորդ ստորջրյա մալուխն է: Կորպորացիան մտադիր է ապագայում եւս նման նախագծեր իրականացնել: