Վարչապետ Հովիկ Աբրահամյանն ընդունել է Վրաստանի պատիժների կատարման, պրոբացիայի եւ իրավական օգնության հարցերի նախարար Կախա Կախիշվիլիին:
Վարչապետը նշել է, որ Հայաստանի եւ Վրաստանի հարաբերությունները գտնվում են բարձր մակարդակի վրա, ինչը լավ հիմք է երկկողմ փոխշահավետ համագործակցության հետագա ընդլայնման ու խորացման համար:
Հովիկ Աբրահամյանի խոսքով՝ երկկողմ հարաբերությունների օրակարգը բավականին հագեցած է եւ տարբեր մակարդակներով պարբերական հանդիպումները նպաստում են հայ-վրացական փոխգործակցության հետագա զարգացմանը: Կառավարության ղեկավարը գոհունակություն է հայտնել երկու երկրների իրավական գերատեսչությունների համագործակցությունից եւ այդ համատեքստում կարեւորել արդարադատության ոլորտում ստորագրված փոխըմբռնման հուշագիրը, որը նպաստել է համագործակցության ընդլայնմանը:
Կախա Կախիշվիլին շնորհակալություն է հայտնել ջերմ ընդունելության համար եւ վարչապետ Աբրահամյանին փոխանցել Վրաստանի կառավարության ղեկավար Գեորգի Կվիրիկաշվիլիի ջերմ ողջույնները: Պարոն Կախիշվիլին նշել է, որ Վրաստանի իշխանությունները մեծապես կարեւորում են Հայաստանի հետ հարաբերությունների զարգացումը տարբեր ոլորտներում, այդ թվում՝ տնտեսության եւ արդարադատության: Վրաստանի պատիժների կատարման, պրոբացիայի եւ իրավական օգնության հարցերի նախարարի խոսքով՝ իրենք պատրաստ են խորացնել եւ ընդլայնել հայ գործընկերների հետ փոխգործակցությունը, իրականացնել փորձի փոխանակում նաեւ պրոբացիոն ծառայության ոլորտում, որը Վրաստանում հաջողությամբ գործում է:
