Փրկարարներն այսօր՝ հուլիսի 31-ի վաղ առավոտյան հայտնաբերել են երկու օր առաջ անհետացած 56-ամյա տղամարդու դին։
Հայաստանի ԱԻՆ-ից NEWS.am-ին հայտնում են, որ հուլիսի 30-ին, ժամը 21.26-ին ահազանգ է ստացվել, որ Արագածոտնի մարզի Հնաբերդ գյուղի բնակիչ՝ 56-ամյա Լ. Վ.-ն առավոտյան գառների հոտը տարել է գյուղին հարակից դաշտ եւ չի վերադարձել:
Դեպքի վայր է մեկնել մեկ մարտական հաշվարկ:
Ժամը 21.50-ից մինչեւ 01.11-ը հրշեջ-փրկարարները Արագած լեռան ստորոտում՝ դեպի Մանթաշ գյուղ տանող հատվածում (մոտ 7 կմ) իրականացրել են որոնողափրկարարական աշխատանքներ, որին մասնակցել են 6 փրկարար, 2 ոստիկան եւ գյուղի 10 բնակիչ:
Որոնողական աշխատանքները շարունակելու նպատակով դեպքի վայր է մեկնել մեկ մարտական հաշվարկ, 7 փրկարար, գյուղի 2 բնակիչ եւ գյուղապետը:
Ժամը 06.25-ի սահմաններում փրկարարները ձորակի հատվածում հայտնաբերել են Լ. Վ.-ի դին:
