Անցած տարվա նոյեմբերի 25-ին Նորք Մարաշում վնասազերծված խմբի գործով առաջիկայում նախաքննության ավարտ կհայտարարվի: Այս մասին հայտնում են NEWS.am-ի աղբյուրները:
Նշենք, որ այս գործից մի մասն առանձնացվել եւ դատարան էր ուղարկվել դեռեւս շաբաթներ առաջ: Նախաքննությամբ ապացուցվել էր, որ չորս մեղադրյալ զենք է վաճառել զինված խմբի ղեկավար Արթուր Վարդանյանին: Դատարանը նրանց մեղավոր էր ճանաչել եւ դատապարտել ազատազրկման:
Թե ինչ է սպասվում մյուս մեղադրյալներին, հայտնի չէ: Նշենք, որ մեղադրյալների թիվը երկու տասնյակի է հասնում:
Հիշեցնենք, որ զինված խումբն ԱԱԾ-ի կողմից վնասազերծվել էր Նորք-Մարաշ վարչական շրջանի առանձնատներից մեկում: Խմբի ղեկավարը «Հայոց Վահան» անվամբ կազմակերպության հիմնադիր Արթուր Վարդանյանն է:
ԱԱԾ-ի փոխանցմամբ, նոյեմբերի 25–ին ԱԱԾ աշխատակիցները ոստիկանության հետ համատեղ տան խուզարկության ընթացքում հայտնաբերվել են տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր եւ պայթուցիկ սարքեր, կապի միջոցներ, փամփուշտներ, փամփշտակալներ, ռազմական հանդերձանք՝ այդ թվում զրահաբաճկոններ: Խուզարկության պահին առանձնատանը, Արթուր Վարդանյանի գլխավորությամբ, հավաքված են եղել հանցավոր խմբակցության 9 անդամները:
ՀՀ ԱԱԾ քննչական վարչությունում հարուցվել է քրեական գործ ՀՀ քրեական օրենսգրքի 223-րդ հոդվածի 1-ի եւ 2-րդ մասերով եւ 235–րդ հոդվածի 3-րդ մասով: