Հայտնի է դարձել, որ այսօր` հոկտեմբերի 16-ին, ժամը 13-ին սահմաններում Երեւան-Սեւան մայրուղում ձորը գլորված «Մերսեդեսի» ղեկին եղել է Կոտայքի մարզի Չարենցավան քաղաքի բնակիչ 27-ամյա Շիրակ Ավետիսյանը, ով տեղում մահացել էր: Իսկ մեքենայի ուղեւորը` 27-ամյա Հայկ Հայրապետյանը, ով մարմնական վնասվածքներով տեղափոխվել է Աբովյանի քաղաքային հիվանդանոց, նույնպես Չարենցավանի բնակիչ է:

Վթարի առթիվ ոստիկանության քննչական գլխավոր վարչության Աբովյանի քննչական բաժնում նախաքննություն է սկսվել: 

Ավելի վաղ NEWS.am-ը հայտնել էր, որ այսօր Երեւան-Սեւան ավտոմայրուղու 22-րդ կիլոմետրում վթար է տեղի  ունեցել: «Մերսեդես» մակնիշի, տրանզիտ համարանիշներով ավտոմեքենայի վարորդը չի կարողացել կառավարել ղեկը, հարվածել է արգելապատնեշներին եւ բառիս բուն իմաստով, գլորվել ձորը: Մեքենան ամբողջությամբ ջարդվել է:

Դեպքի վայրում աշխատանքներ են իարականացրել Կոտայքի մարզի ճանապարհային ոստիկանության աշխատակիցները: Դեպքի վայրում են եղել նաեւ ոստիկանության Աբովյանի քննչական բաժնի քննիչը եւ փորձագետը, նաեւ Հայաստանի արտակարգ իրավիճակների նախարարության փրկարար ծառայության աշխատակիցները, ովքեր ձորը գլորված մեքենայի միջից հանել են զոհվածի դիակը եւ տեղափոխել Աբովյանի դիահերձարան: Վթարի ենթարկված մեքենան ձորից հանելուց հետո այն տեղափոխվել է Աբովյանի ճանապարհային ոստիկանության տուգանային հրապարակ:

Լուսանկարները և տեսանյութը` Գագիկ Շամշյանի