Չինաստանում ավարտել են անապատով անցնող աշխարհի ամենաերկար մայրուղու շինարարությունը: Այս մասին հայտնում է «ՌԻԱ Նովոստի»-ն:
930 կմ երկարությամբ մայրուղին Չինաստանի հյուսիսում՝ Ներքին Մոնղոլիա ինքնավար մարզում իրար է կապում Լինհե եւ Բայգեդա կետերը: Ավտոմայրուղին իր երկարությամբ համաշխարհային ռեկորդակիր է դարձել: Նախագծում կատարված ընդհանուր ներդրումների ծավալը կազմել է 37 մլրդ յուան (5,55 մլրդ դոլար): 2015-ին սկսված մայրուղու շինարարությանը մասնակցել է 30 հազարից ավելի աշխատող:
Լինհե-Բայգեդա հատվածը Պեկին-Ուրումչի պետական նշանակության 2540 կմ երկարությամբ արագընթաց ավտոմայրուղու մի մասն է: Ճանապահը կարեւոր նշանակություն ունի Չինաստանի արեւմտյան շրջանների ռազմավարական զարգացման համար:
Ներքին Մոնղոլիա ինքնավար մարզն ունի 1,18 մլն քառ.կմ մակերեսով տարածք, որի մեծ մասը գտնվում է Մոնղոլական բարձրավանդակի վրա: Մարզի արեւմուտքում են գտնվում 5 խոշոր անապատներ՝ Բադին-Ջարան, Տեգեր, Ուլան-Բուխ, Մու-Ուս եւ Հոբի:
