Արժույթի միջազգային հիմնադրամը մտածում է ոչ թե Հայաստանի բարեկեցության, այլ այն մասին, թե ինչպես հետ ստանա իր վարկերը: Այս մասին սեպտեմբերի 28-ին ԱԺ-ում ասել է ԲՀԿ պատգամավոր Գուրգեն Արսենյանը՝ ելույթ ունենալով Հարկային օրենսգրքի նախագծի 2-րդ քննարկման ժամանակ:
Նրա խոսքով՝ ԱՄՀ ներկայացուցիչներն ասում են, որ Հայաստանին պետք են բյուջեի նոր եկամուտներ: Այդ դեպքում անհասկանալի է, թե ինչու էին նրանք այդ մասին լռում, երբ նոր վարկեր էին տալիս: «Պարզ է, որ նրանք շահագրգռված են իրենց փողը հետ ստանալու մեջ: Իսկ ես մտածում եմ մեր երկրի մասին, մեր ձեռնարկատերերի, իսկ նրանց ապագայի պլանները ամենամխիթարականը չեն. թողնել ամեն բան եւ աշխատել արտասահմանում»,- ասել է Արսենյանը:
