ՓՄՁ-ների մոտ իրականացվող հսկողական աշխատանքները նվազել են: Այս մասին հաղորդագրություն է տարածել Պետեկամուտների կոմիտեն:
ՊԵԿ-ից NEWS.am-ին հայտնում են, որ 2016թ. 8 ամիսներին նախորդ տարվա նույն ժամանակաշրջանի համեմատությամբ ստուգումների արդյունավետության բարձրացում է արձանագրվել թվաքանակի էական կրճատման պայմաններում:
Մասնավորապես՝ 1977-ով պակաս է իրականացվել հսկիչ-դրամարկղային մեքենաների կիրառման ճշտության ստուգում, փոխարենը մեկ ստուգմամբ արձանագրված միջին գումարն աճել է ավելի քան 24 հազ. դրամով կամ 13.5%-ով: Չգրանցված աշխատող պահելու դեպքերի ստուգումները 955-ով պակասել են, մինչդեռ մեկ ստուգմամբ արձանագրված միջին գումարն աճել է ավելի քան 84 հազ. դրամով կամ մոտ 61%-ով: Ելակետային տվյալների եւ ուղղիչ գործակիցների ճշտության ստուգումները նվազել են 306-ով, իսկ 1 ստուգմամբ արձանագրված միջին գումարն ավելացել է ավելի քան 17 հազ. դրամով կամ 7.5%-ով: 194-ով պակաս են իրականացվել նաեւ չափագրման ուսումնասիրությունները, իսկ մեկ ուսումնասիրությամբ արձանագրված միջին գումարն աճել է ավելի քան 294 հազ. դրամով:
Կազմակերպման եւ հսկողության վարչությունն առանձնացրել է ՀՀ տարածք ապրանքներ ներմուծող եւ ՀՀ-ում ապրանքներ արտադրող այն հարկ վճարողներին, որոնց մոտ առկա են վաճառված ապրանքների իրացման մասով ուղեկցող փաստաթղթեր դուրս գրելու փոխարեն ՀԴՄ-ով ձեւակերպելու ռիսկեր: «Հսկողական միջոցառումների արդյունքում ՀԴՄ-ով իրացման ձեւակերպումները 69%-ից իջել են 63%-ի, կամ փաստաթղթաշրջանառությունն ավելացել է 6%-ով, իսկ 13 դեպքով արգելափակվել են ՀԴՄ-ների աշխատանքները»,-նշում է Ա. Ղուկասյանը: Նա վստահեցնում է, որ վարչության անմիջական ուշադրության կենտրոնում են նաեւ ՀՀ օրենսդրությամբ սահմանված կարգով գործատուի կողմից վարձու աշխատողների չգրանցման, ինչպես նաեւ բիզնեսը տրոհելու միջոցով շրջանառության հարկով հարկվող գործունեության տակ քողարկվելու դեպքերը: «Միայն վերջին երկու ամսվա ընթացքում 7 հարկ վճարողի մոտ իրականացված ստուգման արդյունքում արձանագրվել է 49 չգրանցված աշխատող` ավելի քան 16 մլն դրամ հարկային պարտավորության գումարով, իսկ 68 աշխատողի գործատուն գրանցել է նույն ստուգման ընթացքում: Իրականացված հսկողական աշխատանքների արդյունքում պարզվել է, որ 6 հարկ վճարողներ բիզնեսը տրոհել են 24 առանձին շրջանառության հարկ վճարողների»: Ի դեպ, դրանցից 4-ը միավորվել են, իսկ 20-ի վերաբերյալ նյութերն ուղարկվել են ՊԵԿ օպերատիվ հետախուզության վարչություն` հետագա ընթացքը ապահովելու նպատակով: Նույն հարկ վճարողների մոտ արձանագրվել է ՀԴՄ շահագործման կանոնների խախտման 19 դեպք:
Կազմակերպման եւ հսկողության վարչության պետն ընդգծում է, որ վարչության գործունեությունը չի սահմանափակվում ստվերային շրջանառությունների նվազեցմամբ. «Մեր նպատակն է կրճատել ՓՄՁ-ների մոտ հսկողական միջոցառումների իրականացումը` դրանք կատարելով ծայրահեղ անհրաժեշտության դեպքում, ինչպես նաեւ՝ հայտնաբերել շրջանառության հարկի դաշտում քողարկված հարկ վճարողներին»:
