Ֆիլիպինների նախագահ Ռոդրիգո Դուտերտեն չի ուզում, որ համանմանություն անցկացնեն իր եւ Ադոլֆ Հիտլերի միջեւ, որի գործունեությունը նա համեմատել էր երկրում թմրամոլների դեմ իր վարած պայքարի հետ: Այս մասին ասված է նախագահի ներկայացուցիչ Էռնեստո Աբելի հայտարարության մեջ, փոխանցում է «ՌԻԱ Նովոստի»-ն:
Ավելի վաղ Ֆիլիպինների նախագահը հերթական սկանդալային հայտարարությունն էր արել՝ իրեն համեմատելով Ադոլֆ Հիտլերի հետ: Դուտերտեն լրագրողների հետ զրույցում ասել էր, թե որոշ քննադատներ իրեն պատկերում են Հիտլերի զարմիկի տեսքով: Նշելով, որ Հիտլերը միլիոնավոր հրեաների է սպանել, Ֆիլիպինների նախագահն ասել էր. «Ֆիլիպիններում միլիոնավոր թմրամոլներ կան: Ես երջանիկ կլինեի սպանել նրանց: Եթե Գերմանիայում Հիտլեր է եղել, ապա Ֆիլիպիններում կա…»,- ասել էր Դուտերտեն՝ մատնացույց անելով իրեն:
«Սպանությունների մասին նախագահի հիշատակումը կողմնակի կերպով արտացոլում է այն, թե ինչպես են նրան պատկերացնում որպես մարդասպան, Հիտլեր, եւ այդ պիտակը նա մերժում է… Նա ընդամենը անդրադարձել է բացասական համեմատությանը, որն անցկացնում են մարդիկ իր եւ Հիտլերի միջեւ»,- ասված է Աբելի հայտարարության մեջ:
Նրա խոսքով՝ Հիտլերի սպանություններն ու 3 մլն թմրամոլներին սպանելու նախագահի ցանկությունը բոլորովին տարբեր բաներ են:
