Մարդու իրավունքների պաշտպանության ոլորտում ներդրման համար Վացլավ Հավելի մրցանակի դափնեկիր է դարձել եզդի Նադիա Մուրադը, հաղորդում է NEWS.am-ի հատուկ թղթակիցը Ստրասբուրգից:
Հաղթողի անունը հայտարարվել է Եվրոպայի խորհրդի խորհրդարանական վեհաժողովի նստաշրջանի առաջին օրը: Մրցանակը հանձնել է ԵԽԽՎ նախագահ Պեդրո Ագրամունտը:
Նադիա Մուրադը երիտասարդ, քաջ եզդի կին է, որը Իրաքում 2014թ.-ին հազիվ էր փրկվել «Իսլամական պետություն» ահաբեկչական խմբավորման ձեռքից: Այսօր 23-ամյա կինը պայքարում է ԻՊ-ի ահաբեկիչներից տուժած եզդի կանանց եւ աղջիկների իրավունքների համար, հատկապես նրանց, որոնք սեռական ստրկության են ենթարկվել:
Մրցանակի հավակնորդներն այս տարի երեքն էին. սերբ լրագրող եւ մարդու իրավունքների եւ ԶԼՄ ազատության համար պայքարող Ջորդանա Իգրիչը, որը Բալկանյան հետաքննական լրագրության ցանցի (Balkan Investigative Reporting Network) հիմնադիրն է: Նա ակտիվ լուսաբանել Բալկանյան պատերազմները, որից հետո սկսել է զբաղվել մարդու իրավունքների պաշտպանությամբ: Իգրիկը բազմաթիվ լրագրողական մրցանակների դափնեկիր է: Երկրորդ հավակնորդը Մարդու իրավունքների միջազգային ինստիտուտն էր՝ René Cassin հիմնադրամը, որը 1969թ.-ից դասընթացներ եւ հետազոտություններ է կազմակերպում՝ հանուն մարդու իրավունքների եւ խաղաղության: Այս հիմնադրամը մասնագիտացված դասընթացներ է անցկացնում՝ ներկայացնելով ժողովրդավարության սկզբունքներն ու օրենքի կարեւորությունը, ինչպես նաեւ մարդու իրավունքների պահպանումը հատկապես կոնֆլիկտային եւ հետկոնֆլիկտային գոտիներում:
Վացլավ Հավելի անվան միջազգային մրցանակը 3 տարի առաջ հիմնել են Չեխիայի նախկին նախագահ Վացլավ Հավելի գրադարանը, «Խարտի-77» հիմնադրամը եւ ԵԽԽՎ-ն: Մրցանակակիրը ստանում է 60 հազար եվրո:
Աիդա Հովհաննիսյան, Ստրասբուրգ