2017-ից սկսած ՌԴ Գոխրանն ուզում է ալմաստն ուղիղ Հայաստանին վաճառել։ Այս մասին NEWS.am –ի թղթակցին ասել է Գոխրանի (Թանկարժեք մետաղների ու քարերի պետական հիմնադրամի ձեւավորման հարցերով պետհաստատություն) ղեկավար Անդրեյ Յուրինը։

2013-ին կնքված միջպետական համաձայնագրին համապատասխան Ռուսաստանը Հայաստան ալմաստ է արտահանում առանց արտահանման մաքսատուրքերի, բայց «Ալմազյուվելիրէքսպորտ» պետական ձեռնարկության միջոցով։ «Օրենսդրությունը մեզ թույլ է տալիս աշխատել նաեւ առանց միջնորդների։ Հետեւաբար մենք կկարողանանք ավելի շատ հաշվի առնել մեր գործընկերների պահանջները»,- նկատեց ՅՈւրին։

Նշենք, որ հղկված ալմաստների արտահանումը (ներմուծվող հումքի հիման վրա) Հայաստանի արտահանման հիմնական հոդվածներից մեկն է։ 2016-ի առաջին կիսամյակին ադամանդները դարձել են հանրապետության արտահանման հոդվածներից 6-րդը ըստ արժեքի (45 մլն դոլար)։