Մահապատիժը հնարավոր չէ կիրառել հեղաշրջման փորձի մասին գործով դատապարտյալների նկատմամբ, քանի որ օրենքը հետադարձ ուժ չունի։ Այս մասին հայտնել է Թուրքիայի վարչապետ Բինալի Յըլդըրըմը, հայտնում է «ՌԻԱ Նովոստին»։
«Մահապատժի կիրառումը սահմանադրության ու փոխհամաձայնության հարց է։ Եթե մյուս կուսակցությունների միջեւ փոխհամաձայնություն ձեռք բերվի, ապա հնարավոր է ներդնել այդ պատժամիջոցի սահմանափակ կիրառում՝ հաշվի առնելով հասարակական կարծիքը։ Այդ հարցը օրակարգային է դարձել հուլիսի 15-ի պետհեղաշրջման փորձից հետո։Մարդիկ չեն ուզում, որ հանցագործները անպատիժ մնան, ու մենք դա չենք անտեսի։ Սակայն պետք է իմանալ, որ օրենքը հակադարձ ուժ չունի»,- ասել է Յըլդըրըմը։
Ավելի վաղ Թուրքիայի նախագահ Թայիփ Էրդողանը պատրաստակամություն էր հայտնել ստորագրելհուլիսի 15-ի պետհեղաշրջման փորձի մասնակիցների նկատմամբ մահապատիժը կիրառելու մասին օրենքը, եթե խորհրդարանն ընդունի այն։
Թուրքիայում վերջին մահապատիժը կիրառվել է 1984-ին։ 2004-ից երկրում մահապատիժը չեղարկվել էր՝ ԵՄ անդամակցությանը համապատասխանեցնելու համար Թուրքիայի սահմանադրությունում կատարված փոփոխություններից հետո։ ԵՀ նախագահ Ժան Կլոդ Յունկերը հայտնել է, որ եթե Թուրքիան վերականգնի մահապատիժը, ԵՄ-ն անհապաղ կդադարեցնի ԵՄ-ին երկրի անդամակցության գործընթացը։