Վալերի Պերմյակովի փաստաբանը պնդում է, որ վերաքննիչ բողոքի քննման ժամանակ ամբաստանյալը պետք է ներկա լինի, որպեսզի ցրի հնարավոր ճնշման մասին կասկածները:
Հիշեցնենք, որ Հայաստանի Վերաքննիչ դատարանը նոյեմբերի 10-ին սկսել է քննել Վալերի Պերմյակովի գործով բողոքը: Վալերի Պերմյակովի փաստաբան Էդուարդ Աղաջանյանը վերաքննիչ բողոք է ներկայացրել՝ կապված առաջին ատյանի դատարանի որոշման հետ: Այն վերաբերում է ապօրինի սահմանահատման փորձի մասին մեղադրանքին:
Վերաքննիչ դատարանում դատական նիստը սկսվեց գործընթացին փաստաբան Էդուարդ Աղաջանյանի մասնակցության իրավասության հարցի եկարատեւ քննարկումից հետո դատական նիստը հետաձգվեց:
Լրագրողների հետ զրույցում Էդուարդ Աղաջանյանը նշեց, որ առաջին ատյանի դատարանի դատավճիռը ստանալուց հետո բողոք է ներկայացրել: Պաշտպանյալին տեղյակ է պահել այն մասին, որ նախքան նիստը կարող է հետ կանչել բողոքը: «Պերմյակովը Վերաքննիչ դատարանի նիստին ներկա չէր: Նրա փոխարեն բերել էին դիմում, որի համաձայն՝ Պերմյակովը հետ է կանչում փաստաբանի ներկայացրած վերաքննիչ բողոքը: Այդ կապակցությամբ ես միջնորդություն եմ ներկայացրել դատարան ամբաստանյալի ներկայությունը դատարանում ապահովելու համար, որպեսզի պարզենք, թե իրոք նա է գրել դիմումը: Եթե այո, ապա արդյոք ինքնակամ: Եվ իրոք Պերմյակովն ուզում է, որ նրա փաստաբանը շարունակի ներկայացնել իր շահերը Վերաքննիչ դատարանում»,- նշեց Աղաջանյանը:
Հարցին, թե ինքը չի կարող այդ ամենը պարզել իր պաշտպանյալի հետ հանդիպման ժամանակ, փաստաբանը պատասխանեց, որ կարող է, սակայն ցանկալի է, որ դա անի դատարանը: «Այն մասին, ինչ խոսում ենք ես ու իմ պաշտպանայալը, փաստաբանական գաղտնիք է համարվում, եւ ես կարող եմ չհրապարակել զրույցի մանրամասները: Բայց դատարանը պարտավոր է պարզել ամբաստանյալի ցանկությունը, թեկուզ հենց իր համար»,- հիշեցրեց փաստաբանը:
Ինչ վերաբերում է Պերմյակովի դիմումի իսկության կասկածներին, ապա փաստաբանը նշեց, որ իր մասնագիտական պարտականություններից ելնելով՝ պետք է ամեն բանում կասկածի: «Քանի դեռ Պերմյակովը դատարանում չի հայտարարել, որ ինքնակամ է գրել դիմումը, այդ հարցը չի կարող լուծված համարվել»:
Հարցին, թե օրենքը թույլ տալիս է արդյոք համոզվել, որ նրա վրա ճնշում չի գործադրվել, փաստաբանը պատասխանեց, որ չի կարող ամբողջովին վստահ լինել: Սակայն դատարանում արված հայտարարությունները պետք է գնահատի դատարանը: