ԱՄՆ-ի կողմից Թուրքիայում տեղադրվելիք հակահրթիռային պաշտպանության համակարգերի շուրջ իր հրապարակման մեջ թուրքական Zaman-ը նշել է, թե դրանք ուղղված չեն լինի Իրանի դեմ եւ չեն էլ պաշտպանի Իսրայելին, ավելին՝ Իսրայելի հարձակումից կպաշտպանեն Թուրքիային։

Դեռեւս շարունակվող հակահրթիռային պաշտպանության համակարգերի տեղակայման խոսակցությունների ֆոնին,  թուրքական կողմը երաշխիքներ է պահանջել ԱՄՆ-ից, որ դրանցում տեղադրված հետախուզական սարքերի միջոցով ստացված տվյալները չեն տրամադրվի Իսրայելին, նաեւ պահանջել է Իրանին հանել վտանգ ներկայացնող երկրների շարքից։  ԱՄՆ-ը այս պահանջներին դրական պատասխան է տվել։

Հակահրթիռային կայանքների տեղադրումը, որոշ շրջանակներ համարում են ԱՄՆ-ի կողմից Իսրայելին պաշտպանելու քայլ, ինչը չի համապատասխանում իրականությանը երկու պատճառով՝ Նախ, Իսրայելը ՆԱՏՕ-ի անդամ չէ։ Երկրորդ` Իսրայելը նման կայանքի կարիք չունի, քանի որ ունի սեփական հակահրթիռային համակարգ։ Ավելին՝  ՆԱՏՕ-ի համաձայնագրով, եթե մի երկիր հարձակվում է ՆԱՏՕ-ի անդամ երկրի վրա՝ այն համարվում է հարձակում ՆԱՏՕ-ի վրա։ Ուստի, ԱՄՆ-ը հասկացնում է, որ Թուրքիայում տեղադրվելիք հակահրթիռային կայանքները Թուրքիային կպաշտպանեն Իսրայելի հարձակումներից։