Լեռնային Ղարաբաղի շուրջ իրավիճակն, իհարկե, մտահոգության տեղիք է տալիս։ Այս մասին նոյեմբերի 19-ին Երեւանում լրագրողների հետ զրույցում ասել է ՌԴ Դաշնային ժողովի Դաշնության խորհրդի միջազգային գործերի հանձնաժողովի նախագահ Կոնստանտին Կոսաչովը։
«Մենք տագնապով էինք հետեւում այս տարվա ապրիլի իրադարձություններին։ Դուք գիտեք, որ Ռուսաստանն անմիջապես արձագանքեց։ Մենք միացրեցինք բոլոր հնարավորությունները հույզերի լարումը թուլացնելու եւ իրավիճակը նորից քաղաքական հուն վերադարձնելու համար։ Փառք Աստծու, դա հաջողվեց շատ արագ անել, բայց, ցավոք, դա ոչ մի կերպ առաջ չմղեց ղարաբաղյան հակամարտության կարգավորման գործընթացը։ Այն, ցավոք, նույն տեղում է մնացել»,– ասել է Կոսաչովը։
Նրա խոսքով՝ մի քանի կուլմինացիա է եղել, երբ հույս էր առաջացել, որ հնարավոր է առաջընթաց գրանցել։ «Մենք ամենահանգամանալից կերպով խնդիրը քննարկել ենք ՀՀ արտգործնախարարի եւ պաշտպանության նախարարի հետ։ Լսել ենք, որ հայկական կողմն, անխոս, պատրաստ է առաջ շարժվել։ Հայկական կողմի կարծիքով, ձգձգման պատճառը Ադրբեջանն է։ Հասկանալի է, որ մենք կուզեինք տեսնել իրավիճակ, որտեղ Հայաստանն ու Ադրբեջանը ընդհանուր լեզու են գտել։ Ընդհանուր առմամբ, Ռուսաստանի առաքելությունը մենք տեսնում ենք նրանում, որ վերջինս նպաստի այդ բանակցությունների»,– ընդգծել է Կոսաչովը։
Նա անկեղծ հավատում է, որ խորհրդարանական ձեւաչափը պահանջարկ կվայելի այդ առումով։ «Մենք, բնականաբար, սեփական ուղիղ կապերն ունենք եւ ադրբեջանցի գործընկերների հետ։ Ես նրանց կհայտնեմ այն, ինչ լսել եմ այստեղ։ Խորհրդարանական թրեքը բոլորովին չպետք է խանգարի բանակցային գործընթացին. Ոչ մի հավակնություն չկա, սակայն մենք պարտավոր ենք տեղեկություն տարածել, հասնել ղարաբաղյան հակամարտության լուծման գործում խորհրդարանական հնարավորություններով քաղաքական, այլ ոչ թե ռազմական գործիքների առաջնայնությանը եւ կանենք դա»,– ասել է նա։