Deutsche Telekom գերմանական հեռահաղորդակցային հոլդինգը ենթադրում է, որ ինտերնետային կապի խափանումները, որոնք սկսվել են նոյեմբերի 27-ին ու անդրադարձել ավելի քան 900 հազար հաճախորդների վրա, ցանցահենային հարձակման հետեւանքով են առաջացել, հայտնում է BBC–ն։
Ընկերության հայտարարության մեջ ասվում է, որ հաճախորդները ինտերնետային կապի հետ խնդիրներ են ունեցել կիրակի ժամը 14։00-ից սկսված։ Փորձագետները պարզել են, որ ռոութերների աշխատանքում խափանում է եղել, բայց պատճառը հասկանալ չեն կարողանում։
«Չենք բացառում, որ ռոութերների վրա արտաքին հարձակում է եղել, ինչի հետեւանքով նրանք չեն կարողանում գրանցվել ցանցի ներսում»,- ասվում է ընկերության հայտարարության մեջ։
Ինտերնետային կապը շարունակում է անհասանելի մնալ 900 հազար օգտատերերի համար։ Deutsche Telekom-ի ինտերնետային կապի օգտատերերի ընդհանուր քանակը մոտ 20 մլն է գնահատվում։