Հայաստանի էկոնոմիկայի նախարարությունը շարունակում է ռուս գործընկերների հետ քննարկել Ռուսաստանից Հայաստան ՌԴ ներքին անձնագրով ուղեւորությունների հնարավորությունները։ Այս մասին NEWS.am –ի թղթակցին հայտնել է Էկոնոմիկայի նախարարության զբոսաշրջության վարչության պետ Մեխակ Ապրեսյանը։
Հիմա համագործակցության նոր հնարավորությունները քննարկվում են ռուսական «Ռոստուրիզմ» դաշնային գործակալության հետ, հավելել է նա։
«Մենք ասել ենք մեր ռուս գործընկերներին ներքին անձնագրերով ուղեւորությունների առաջարկի մասին։ Հիմա նրանք քննարկում են այդ առաջարկը»,- նկատեց Ապրեսյանը։
Հիշեցնենք, որ դեռ 2015-ի սեպտեմբերին Ռուսաստանի քաղաքացիներին առանց արտասահմանյան անձնագրերի ընդունելու պատրաստակամության մասին հայտնել էր Հայաստանի միգրացիայի պետական ծառայության ղեկավար Գագիկ Եգանյանը։
2016-ի ապրիլի 7-ին ՌԴ վարչապետ Դմիտրի Մեդվեդեւը երեւանյան այցի ժամանակ հայտնեց, որ Ռուսաստանի կառավարությունը պատրաստ է իրականացնել հայկական կողմի նախաձեռնությունը։
