Լատվիայի մայրաքաղաք Ռիգայի կենտրոնում տեղադրված տոնածառը հայտնվել է Գինեսի ռեկորդների գրքում։ Տոնածառի լույսերը վառել է Ռուբ Գոլդբերգի անունով կոչված աշխարհի ամենամեծ մեքենան։
Քաղաքապետարանի 2 հարկերում եւ հրապարակում հավաքել են մեխանիզմը, որն այդպես է կոչվել ամերիկացի ծաղրանկարչի անունով։ Հենց նրան է պատկանում սարքի գաղափարը, որը շատ պարզ գործողությունը կատարում է չափազանց բարդ, բազմաստիճան մեխանիզմով։ Այս անգամ դոմինոյի սկզբունքով գործող շղթան կազմված է եղել 412 փուլից, որի վերջում վառվել են եղեւնու տոնական լույսերը։ Պատվավոր առաքելությունը ղեկավարում էր քաղաքապետ Նիլ Ուշակովը։
Համաշխարհային ռեկորդ սահմանելու համար հավաքել էին պրոֆեսիոնալների թիմ, որոնք արդեն փորձ ունեին համանման նախագծերի իրականացման հարցում։ Անցյալ տարի նրանք ստեղծել էին Գոլդբերգի մեքենան, որը շղթայի 50 փուլից էր կազմված։
