ՄԱԿ-ում ԱՄՆ-ի մշտական ներկայացուցիչ Սամանտա Փաուերի հայտարարությունը Հայոց ցեղասպանության ժխտման փաստի վերաբերյալ պետք է դիտարկել բացառապես Արեւմուտք-Թուրքիա լարված հարաբերությունների ենթատեքստում: NEWS.am-ի հետ զրույցում այսպիսի տեսակետ հայտնեց թուրքագետ Ռուբեն Մելքոնյանը:
Նրա խոսքով՝ ԱՄՆ ներկայացուցչի հայտարարությունը ամենեւին չի նշանակում, որ Հայոց ցեղասպանության հարցի վերաբերյալ Վաշինգթոնի քաղաքականությունը փոփոխության է ենթարկվել: «Հայոց ցեղասպանության հարցում ԱՄՆ-ի դիրքորոշումը արդեն երկար տարիներ անփոփոխ է մնում: Սա այն դեպքերից մեկն է, երբ քաղաքական մտածողությունը բախվում է իրական շահերին»,- նշեց Մելքոնյանը՝ հավելելով, որ դրա ընդգծված օրինակն է ԱՄՆ նախագահ Օբամայի դիքորոշումը, որը նախապես խոստացել էր ճանաչել Ցեղասպանությունը, իսկ հետո ստիպված էր հրաժարվել իր իսկ խոսքից:
Նշենք, որ դեկտեմբերի 1-ին ՄԱԿ-ում ԱՄՆ-ի մշտական ներկայացուցիչ Սամանտա Փաուերն իր ելույթում նշել է, որ դեռեւս գոյություն ունի այնպիսի երեւույթ, ինչպիսին Հայոց ցեղասպանության ժխտումն է: