ՀՅԴ ներկայացուցիչներն իմ ընկերներն են,բայց որեւէ քննարկում ՀՅԴ-ի հետ, իմ անդամակցության, համագործակցության հարցով չի եղել: Այս մասին այսօր՝ նոյեմբերի 7-ին, Ազգային ժողովում լրագրողների հետ զրույցում ասել է ԱԺ պատգամավոր Ռուբիկ Հակոբյանը:
«Դա բացարձակ անհեթեթություն է, նման հարցը չկա, նույնը ժխտել է նաեւ ՀՅԴ-ն»:
Պատգամավորը նշեց, որ դեռ չի որոշել, թե ինչպես է մասնակցելու ընտրություններին, որ քաղաքական ուժի հետ, բայց որ մնալու է քաղաքականության մեջ, դա պարզ է:
«Որեւէ հանդիպում, որեւէ քննարկում այսօր ես չեմ անցկացնում: Բայց կարող եմ ասել, որ բնականաբար, ընդդիմադիր դաշտում եմ լինելու»,- նշեց Հակոբյանը:
Հարցին՝ ՀՅԴ-ի հետ չե՞ք քննարկել մասնակցության հարցը, թե՞ վերջնական որոշել եք, որ իրենց հետ չեք մասնակցելու, Ռուբիկ Հակոբյանը պատասխանեց. «Դաշնակցության ներկայացուցիչներն իմ ընկերներն են, ամեն օր իրար հետ ենք, այսօր էլ ՀՅԴ սենյակում էի, բայց հավատացեք, որ որեւէ քննարկում այս թեմայում չի եղել: Կդժվարանամ ասել՝ բացառվում է, թե ոչ, բայց մինչ այս պահը այս թեման չի շոշափվել»:
Հակոբյանն ասաց, թե չգիտի՝ քաղաքական քարտեզն ինչպես կդասավորվի, որովհետեւ քաղաքական դաշտը կայացած չէ ու ցանկացած պահին կարող է վերադասավորումներ ունենալ: «Իմ հետագա համագործակցությունը կլինի ընդդիմադիր դաշտում»,- հավելեց նա:
