Գործարար, ԱԺ պատգամավոր Ալեքսան Պետրոսյանը (ՄԱՊ-ի Ալիկ) հավաստիացնում է, որ գալիք ընտրություններին մասնակցելու վերաբերյալ ինքը դեռեւս հստակ որոշում չի կայացրել: Այս մասին Պետրոսյանն այսօր` դեկտեմբերի 8-ին, ասել է ԱԺ-ում լրագրողների հետ զրույցում:
Հիշեցնենք, որ «Հրապարակ» թերթը գրել էր, թե հաջորդ խորհրդարանում մի շարք պատգամավորների հետ միասին հաջորդ խորհրդարանում չի հայտնվի նաեւ ՄԱՊ-ի Ալիկը, քանի որ նա եւս մյուսների հետ միասին չի ստացել ՀՀ նախագահ Սերժ Սարգսյանի «դաբրոն»:
«Բայց ումի՞ց են դաբրո ստանում»,- ասաց նա, ապա շարունակեց. «Որոշում կայացնողը ես եմ, բայց որոշում ու նման ցանկություն դեռ չունեմ»:
ՀՀԿ-ի ցուցակում ընդգրկվելու վերաբերյալ էլ Ալիկ Պետրոսյանն ասաց, որ ինքն այդ մասին եւս տեղեկություններ չունի, իսկ ցուցակում հայտնվելու խնդիրը որոշում է կուսակցության նախագահ Սերժ Սարգսյանը:
«Այսօր աբսուրդ է նման հարցերի շուրջ խոսելը, քանի դեռ հստակություն չկա: Հիմա ես ոչ մի բան չեմ կարող ասել, որովհետեւ եթե մարդը տրամադրված չէ այդ մասին խոսել, ապա չի կարող ոչինչ ասել: Միակ բանը, որ կարող եմ հաստատ ասել՝ հիասթափություն չկա: Ինչ վերաբերում է հարցին, թե կլինեմ հաջորդ խորհրդարանում, թե՞ ոչ՝ որոշողը ես չեմ, այլ կուսակցության նախագահը»,- եզրափակեց պատգամավորը:
