Հայտնի է դարձել, թե որն է 2016-ին Facebook Live–ի ամենադիտված տեսագրությունը, հայտնում է CNN–ը։ Պարզվում է, որ ամենաշատը դիտել են Չուբակկիի դիմակով ամերիկուհի Քենդիս Փեյնի  տեսահոլովակը։

Փեյնը աշխարհահռչակ էր դարձել այն բանից հետո, երբ հրապարակել էր իր մասնակցությամբ մի տեսագրություն։ Նա իր որդու համար պատվիրել էր «Աստղային պատերազմներ» ֆիլմի հերոսի դիմակը ու որոշել էր իր վրա փորձել այն։ Ամերիկուհուն զվարճացրել էր այն, որ դիմակը ձայներ էր հանում, որը նման է Չուբակկիի ոռնոցին, իսկ Փեյնի ծիծաղն էլ իր հերթին նվաճել էր օգտատերերի համակրանքը։ Այդ տեսահոլովակը արդեն ավելի քան 163 մլն դիտում ունի։

Երկրորդ տեղում Թեդ Յոդերն է,  որը ծնծղայով նվագել է Tears for Fears խմբի Everybody Wants to Rule the World երգը։ Նրա տեսահոլովակն ունի ավելի քան 85 մլն դիտում։

Երրորդ տեղում BuzzFeed պարբերականն է, որը որոշել էր ԱՄՆ հաջորդ նախագահական ընտրությունների հետադարձ հաշվարկ սկսել։ Այն դիտել են 51 մլն անգամ։

Չորրորդ տեղում Դալասում արված մի տեսագրություն է, որտեղ մարդիկ գրկում էին ոստիկաններին, իսկ հինգերորդ տեղում՝ ԱՄՆ-ում ընտրությունների արդյունքների մասին NBCNews-ի տեսահոլովակը։