ԵԱՀԿ նախարարական հանդիպումը ավարտվել է առանց ամփոփիչ հայտարարության ընդունման։ Եզրափակիչ նիստի ժամանակ ԵԱՀԿ գործող նախագահ, Գերմանիայի արտգործնախարար Ֆրանկ Վալտեր Շթայնմայերը ներկայացրել է միայն երեք համանախագահների (Գերմանիայի, Ավստրիայի ու Իտալիայի) հռչակագիրը ու սեփական ամփոփիչ հայտարարությունը, հայտնում է ՏԱՍՍ-ը։
ԵԱՀԿ ԱԳՆԽ ամփոփիչ հռչակագիր վերջին անգամ 2002-ին է ընդունվել։
Եռյակի տարածած հաղորդագրության մեջ շեշտվում է սպառազինումների հսկողության մասին երկխոսության վերագործարկմանն ուղղված ՝ Շթայնմայերի սկսած աշխատանքները շարունակելու պատրաստակամությունը։ Բացի դրանից, փաստաթղթում նշվում է հակամարտությունների կարգավորման ուղղությամբ ԵԱՀԿ հնարավորությունների ամրապնդման անհրաժեշտությունը։ Իսկ նոր մարտահրավերների շրջանում նշված են ահաբեկչությունը, արմատականացումն ու բռնի ծայրահեղականությունը, կիբերհանցագործությունն ու միգրացիա։
Շթայնմայերը որպես գործող նախագահ իր ամփոփիչ հայտարարության մեջ նորից նշել է, որ Եվրոպայում սպառազինումների շրջանառության հսկողության առկա համակարգը չի համապատասխանում ժամանակակից իրողություններին ու լրամշակման կարիք ունի։ Նրա խոսքով, նոր ճարտարապետությունը պետք է կառուցվի այնպես, որ ապահովի «բոլորի անվտանգությունը»։
«Ով համարում է, որ հնարավոր է ազգային մակարդակով պատասխանել շատ մարտահրավերների, օրինակ միջազգային ահաբեկչությանը, նա սխալվում է»,- հավելել է Գերմանիայի արտգործնախարարը։
