Շուրջ մեկ տարի կալանքի տակ գտնվող Վահան Շիրխանյանի վիճակը շարունակում է ծայրահեղ ծանր մնալ: Այս մասին NEWS.am-ի թղթակցին ասաց նրա պաշտպան Հայկ Ալումյանը:
«Իմ, մարդու իրավունքների պաշտպանի, Եվրոպական դատարանի ահազանգերը ոչ մի կերպ չեն ազդում: Վահան Շիրխանյանի վիճակի մեջ որեւէ դրական փոփոխություն չկա, ՔԿՎ-ն տարբեր թղթեր է միայն ներկայացնում, որ իմ պաշտպանյալն առողջ է, սակայն դա իրականությանը չի համապատասխանում»,- ասաց նա:
Փաստաբանը մեկ անգամ եւս հիշեցրեց նախկին պաշտոնյայի հայտարարությունը, որ այս ամենն անում են իշխանությունները, քանի որ նախկինում խնդիրներ են ունեցել միմյանց հետ:
Վահան Շիրխանյանը ձերբակալվել է 2015թ.-ի դեկտեմբերի 21-ին Նորք-Մարաշում զինված խմբավորման վնասազերծման գործի շրջանակում: Նա մեղադրվում է խմբավորման ղեկավար Արթուր Վարդանյանի հետ համագործակցության մեջ: Ընթացիկ տարվա սեպտեմբերին քննչական մարմինը Վահան Շիրխանյանին նոր մեղադրանք առաջադրեց՝ իշխանության գրավման նախապատրաստում:
Գործն արդեն դատարանում է, սակայն Վահան Շիրխանյանը նիստին ներկա չէր, առողջական վիճակը թույլ չէր տվել` ներկայանալ դատական նիստին:
