«Սասնա ծռեր» խմբի անդամ Հովհաննես Հարությունյանի կալանքի ժամկետը երկու ամսով երկարացվել է: Այս մասին NEWS.am-ի հետ զրույցում ասաց նրա շահերի պաշտպան Հայարփի Սարգսյանը: Նա նշեց, որ իր պաշտպանյալը ցանկություն է հայտնել մասնակցել դատական նիստին, սակայն, առողջական խնդիրների պատճառով չի կարողացել մասնակցել:
«Դատարանը բոլոր միջոցները ձեռնարկեց, որպեսզի ապահովեր նրա ներկայությունը, բայց քանի որ նա վատ վիճակում էր, երկու անգամ հետաձգվեց դատականի նիստը, հետո առանց իր ներկայության որոշում կայացվեց: Դեկտեմբերի 12-ին դատարան էին բերել, բայց Հովհաննեսը նիստերի դահլիճ չմտավ, քանի որ ոչ սթափ վիճակում էր, ինչ-որ բանի ազդեցության տակ, նրան երեւի ինչ-որ դեղեր էին սրսկել: Նրա այդ վիճակը դատավորն էլ նկատեց, արձանագրեց»,-ասաց պաշտպանը:
Հայարփի Սարգսյանը նշեց, որ դատական նիստը հետաձգվել է եւ ի վերջո այն կայացել է առանց Հովհաննեսի ներկայության:
Ավելի վաղ NEWS.am-ը տեղեկացրել էր, որ Հովհաննես Հարությունյանի շահերի պաշտպանն ահազանգել է, որ իր պաշտպանյալը գտնվում է ոչ ադեկվատ վիճակում:
Հիշեցնենք, որ ոտքից ծանր վիրավորում ստացած Հովհաննես Հարությունյանի առողջական վիճակի մասին հակասական կարծիքներ կան: Ըստ փաստաբան Հայարփի Սարգսյանի՝ իր պաշտպանյալի վիճակը գնալով վատանում է, նրան շտապ վիրահատություն է պետք, քանի որ ոտքը սկսել է սեւանալ, բարակել, իսկ նա էլ ցավերին չի դիմանում: Մարդու իրավունքների պաշտպանի գրասենյակը հակառակն է պնդում: