Անցած տարին ծանր էր, Ղարաբաղյան երկրորդ պատերազմը տեղի ունեցավ ու մինչ օրս աչքիս առաջ են Ադամը, Հայկը, Քյարամը եւ բոլոր այն խոշտանգված երեխաները, որոնց նկարները ստիպված եղա տեսնել։ Այս մասին NEWS.am-ի հետ զրույցում ասել է ԲՀԿ ղեկավար Նաիրա Զոհրաբյանը։
«2016-ից խոսելիս՝ մինչեւ հիմա աչքիս առաջ են այդ խոշտանգված երեխաները, որոնց լուսանկարները ստիպված եղա նայել ի պաշտոնե․․․ Չգիտեմ՝ այս ամենից ինչ հետեւություն արվեց, բայց բոլորս այդ օրերին միասին դարձանք ազգ-բանակ առանց որեւէ օրենքի ու պարտադրանքի։ Բոլորս ցույց տվեցինք, որ միասնական ենք: Բայց մեկ բան հստակ է, որ ղարաբաղյան հակամարտության հարցը պետք է լուծվի՝ մի կողմ դնելով էմոցիաները, ուռա-ֆիդայականությունը, կեղծ հայրենասիրությունը, որը շատերը դարձրել են կեղտոտ եւ անբարո բիզնես։ Մեր բոլոր քաղաքական ուժերը պետք է մի կողմ դնեն սուտի ֆիդայականությունը եւ պիտի հասկանան, որ մենք իրավունք չունենք խնդրի լուծումը ձգձգելու»,-ասաց Նաիրա Զոհրաբյանը։
Պատգամավորն ակնկալում է, որ նոր խորհրդարանում, նոր քաղաքական փուլում քաղաքական ուժերը, իշխանությունը մի կողմ դնելով կեղծ հայրենասիրությունը՝ կարողանան սթափ գնահատել իրավիճակը։
«Ղարաբաղյան հակամարտության կարգավորման հարցով իշխանությունը պետք է անկեղծ զրուցի քաղաքական ուժերի եւ հասարակության հետ»։
