Թուրքիան, իր ազգային անվտանգության ռազմավարության մեջ արտաքին սպառնալիքների ցանկից հանելով Հայաստանին, պարզապես արձանագրել է իրողությունը, որ վտանգ չի տեսնում մեր երկրից: Այդ մասին NEWS.am-ի թղթակցի հետ զրույցում հայտնեց Քաղաքական եւ միջազգային հետազոտությունների հայկական կենտրոնի փորձագետ Ռուբեն Մեհրաբյանը:
«Թուրքիան Հայաստանից, որպես պետություն, վտանգ չի տեսնում»,- նշեց փորձագետը:
Մեկնաբանելով փաստը, որ Թուրքիան իր արտաքին սպառնալիքների ցանկում ընդգրկել է իր վաղեմի դաշնակից Իսրայելին՝ Մեհրաբյանը նշեց, թե այդ քայլը խիստ պոպուլիստական բնույթ է կրում եւ կապված է եկող տարի կայանալիք խորհրդարանական ընտրությունների հետ: «Սա իշխող կուսակցության ցանկությունն է՝ «իսլամական փողոցում» երեւալ որպես իսլամիստների հակառակորդների դեմ պայքարի առաջամարտիկ: Այս քայլի տակ թշնամական որեւէ դրսեւորում, առնվազն տեսանելի ապագայում չի լինի»,- նշել է փորձագետն ու խորհուրդ տվել «զանազանել հռետորաբանությունն ու փաստերը, նույնիսկ եթե դա ազգային անվտանգության խորհրդի ընդունած փաստաթուղթ է»:
Նշենք, որ Թուրքիայի ԱԱԽ-ն ազգային անվտանգության ռազմավարությունից՝ «Կարմիր գրքից» արտաքին սպառնալիքների ցանկից հանել է Հայաստանին, Սիրիային, Իրանին, Վրաստանին, Ռուսաստանին, փոխարենը որպես արտաքին սպառնալիք ընդգրկելով Իսրայելին, որի հետ տասնամյակներ շարունակ եղել է դաշնակցային հարաբերությունների մեջ, սակայն վերջին շրջանում նրանց հարաբերությունները խիստ վատացել են:
