Իսպանիայում առգրավվել է մինչեւ 12 հազար միավոր զենք, որը նախատեսված էր հանցավոր խմբավորումներին, նաեւ ահաբեկիչներին վաճառելու համար: Դրանց թվում եղել են՝ ինքնաձիգներ, ատրճանակներ եւ նույնիսկ օդանավ խոցելու ունակ խոշոր տրամաչափի գնդացիրներ: Սեւ շուկայում այս ամենն արժե մոտ 10 մլն եվրո, հայտնում է NTDTV-ն:
Ոստիկանության գործողության ընթացքում 5 մարդ ձերբակալվել է, որից մեկը կին է, բոլորն իսպանացիներ են: ՆԳ նախարարության հաղորդագրության մեջ նշված է, որ մեղադրյալներն ստացել են դուրս գրված զենքը, վերանորոգել եւ սեւ շուկայում վաճառել «կազմակերպված խմբավորումների եւ ահաբեկչական կազմակերպությունների» անդամներին:
Գործողությունն անցկացվել է Եվրոպոլի հետ համատեղ: Շուրջկալների ընթացքում առգրավվել է նաեւ 80 հազար եվրո: