![](img/news/03/68/28/default.jpg)
Սոցիալ Դեմոկրատ Հնչակյան կուսակցության (ՍԴՀԿ) Կենտրոնական վարչության նիստում որոշում է կայացվել կուսակցությունից հեռացնել Վահան Շիրխանյանին, Գեւորգ Պերկուպերկյանին, Նարեկ Գալստյանին, Գագիկ Մելիքյանին եւ Արսեն Կուպելյանին:
Այս առնչությամբ ՍԴՀԿ-ն հայտարարություն է տարածել, որտեղ ասվում է, որ հիմք ընդունելով Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանի վճիռը եւ վերաքննիչ դատարանի որոշումը, ՍԴՀԿ ԿՎ-ն հայտարարում է, որ Հայաստանում գրանցված ՍԴՀԿ ԿՎ ատենապետն է Լյուդմիլա Սարգսյանը եւ չկա մեկ այլ գրանցված ՍԴՀԿ ԿՎ , որի անվան տակ կարող են հանդես գալ այլ անձինք:
Նշվում է նաեւ, որ հիշյալ անձինք ՍԴՀԿ շարքերից հեռացվել են կուսակցության կողմից որդեգրած քաղաքական ընդդիմադիր գիծը փոխելու միտումով ներկուսակցական պառակտում հրահրելու եւ իրականացնելու համար:
Բացի այդ, որոշման մեջ ասվում է, որ «Վարդան Խաչատրյանի ապօրինի անդամությունը կասեցվել է դեռ ՍԴՀԿ ԿՎ 2009-ի հոկտեմբերի 31-ի թիվ 11 նիստի որոշման հիման վրա»:
Հիշեցնենք, որ հայաստանյան դատական ատյանները Հայաստանում օրինական են ճանաչել Լյուդմիլա Սարգսյանի ղեկավարած ՍԴՀԿ-ն, իսկ կուսակցության պերկուպերկյանական թեւը հայտարարում է, որ իրական ՍԴՀԿ-ն իրենք են: