Ադրբեջանի պետական հանձնաժողովի նախագահի հայտարարությունները լկտի սուտ են եւ զրպարտություն: Այս մասին հայտարարեց Հայաստանի Գերեվարվածների, պատանդների եւ անհետ կորածների հանձնաժողովի աշխատանքային խմբի ղեկավար Արմեն Կապրիելյանը՝ NEWS.am-ի խնդրանքով մեկնաբանելով Ադրբեջանի հանձնաժողովի աշխատանքային խմբի ղեկավար Իսմաիլ Ախունդովի հայտարարությունը, թե «ականատեսները պատմում են, որ հայ զինծառայողները 29 երեխայի են գերեվարել եւ դա միջազգային կազմակերպություններից թաքցրել»:
«Ինչպես միշտ, ադրբեջանական կողմը, գերիների եւ անհետ կորածների մասին բարձրաձայնելով, չի բերում ոչ մի փաստացի եւ անհատական տվյալ: Մերկապարանոց հայտարարություններ են, որոնք աննշան փաստով իսկ չեն հաստատվում»,- հայտարարեց Կապրիելյանը:
«Իմ կողմից կարող եմ հավաստիացնել, որ հայ զինծառայողները, ի տարբերություն հակառակորդի, չեն զբաղվում խաղաղ բնակիչների շրջանում գերեվարումով»,- ընդգծեց աշխատանքային խմբի ղեկավարը:
Նշենք, որ նախկինում Ադրբեջանի ներկայացուցիչները արդեն բազմիցս անհետ կորածների թվի մասին հակասական տվյալներ են ներկայացրել:
