Գագիկ Ծառուկյանի վերադարձը քաղաքականություն չի նվազեցրել ՀՀԿ-ի շանսերը։ Այս մասին այսօր՝ հունվարի 19-ին, ՀՀԿ ԳՄ նիստից հետո լրագրողների հետ զրույցում հայտնեց Հանրապետական կուսակցության մամուլի քարտուղար Էդուարդ Շարմազանովը՝ անդրադառնալով հարցին, թե Ծառուկյանի վերադարձը քաղաքականություն վտանգ ներկայացնո՞ւմ է ՀՀԿ-ի համար առաջիկա խորհրդարանական ընտրություններում:
«Հատուկ ձեր նշած գործչին չենք թիրախավորել: Անկախ նրա եւ նրա գլխավորելիք դաշինքի ծրագրերից՝ մենք ունենք մեր ծրագիրը, գնալու ենք մեր քաղաքական օրակարգով, եւ նրա վերադարձը քաղաքականություն ո՛չ ՀՀԿ-ի շանսերն է նվազեցրել, ո՛չ էլ ռազմավարության մեջ փոփոխություն է մտցրել»,-ասաց Շարմազանովը։
Լրագրողներից մեկը հետաքրքրվեց, արդյո՞ք դեռ գործում է Գագիկ Ծառուկյանի մականվան վերաբերյալ նախագահ Սարգսյանի արգելքը։ Շարմազանովն ասաց, որ իր մոտ գործում են բարոյական արգելքներ:
«Հարցրեք նրանց, ովքեր այդ տերմինալոգիան օգտագործում էին, ինձ մոտ գործում են բարոյական արգելքներ, ինձ մոտ արգելքները շատ նորմալ դրված են՝ ինչն է կարելի, ինչը՝ չէ, իմ կարծիքը գործչի վերաբերյալ կախված է նրա գործունեությունից»,- ասաց նա։
