Հեռանկարային հետազոտությունների հիմնադրամը մտադիր է ռուսական թռչող ավտոմեքենա մշակել: Այս մասին հայտնել է «ՌԻԱ Նովոստին»՝ վկայակոչելով հիմնադրամի ֆիզիկատեխնիկական հետազոտությունների ուղղության խորհրդատու Յանա Չիբիսովին:
«Խոսքը լիարժեք թռչող սարքի մասին է, սակայն փոխադրումների եւ վարելու համար հասանելի ավտոմեքենայի: Մինչ օրս մեծ տարբերություն կա օդաչուի եւ ավտոմեքենայի վարորդի միջեւ: Այս տարբերությունը պետք է վերացնել՝ սա է գերխնդիրը»,- հայտարարել է Չիբիսովը:
Թռչող ավտոմեքենան կօգտագործվի բեռնափոխադրումների եւ ուղեւորափոխադրումների համար, իսկ նրա առավելագույն տարողությունը կկազմի 100-ից մինչեւ 1000 կգ: Մեքենան պետք է ավտոպիլոտ ունենա եւ 50x50 մետր չափերով հարթակից ուղղաձիգ թռիչքի եւ վայրէջքի համակարգ: Հիմնադրամում հույս ունեն, որ ավտոմեքենան կարող է օգտագործվել փրկարարական գործողությունների ժամանակ: Լավագույն առաջարկները կընտրվեն ընթացիկ տարվա ապրիլի 28-ին: Նախագծի ֆինանսավորման ծավալը 12 ամսվա համար կկազմի 3 մլն ռուբլի:
