Հայաստան-ԵՄ հարաբերությունների առումով 2016 թվականը լավն էր, ինտենսիվ քաղաքական երկխոսություն եղավ, ակնկալում ենք, որ Հայաստանի և Եվրամիության միջև բանակցվող շրջանակային համաձայնագիրը նոր մակարդակի կհասցվի: Այս մասին այսօր՝ հունվարի 24-ին, լրագրողների հետ հանդիպման ժամանակ նշել է Հայաստանում Եվրամիության պատվիրակության ղեկավար, դեսպան Պյոտր Սվիտալսկին:
«Եվրամիություն-Հայաստան շրջանակային համաձայնագրի քննարկման վեց փուլ տեղի ունեցավ: Շրջանակային համաձայնագիրը վերաբերում էր հիմնականում քաղաքական հատվածին, որից բացի առեւտրային հարցերի վերաբերյալ բանակցություններ եղան: Հույս ունենք, որ 2017թ. Շրջանակային համաձայնագիրը իրականություն կդառնա, հեռանկարը բավականին լավատեսական է. բանագնացները շատ մոտ են համաձայնագրի կնքմանը:
Հույս ունենք, որ այս տարին իրականություն կդարձի նոր շրջանակային համաձայնագիրը: Մենք իսկապես բանակցությունների վերջին փուլերում ենք: Շատ ծանր աշխատանք է իրականացվում թե՛ հայ գործընկերների, թե՛ Բրյուսելի կողմից: Կոնկրետ ամսաթվերի մասին խոսել չենք կարող, բայց կարծում եմ, որ բանագնացները շատ մոտ են համաձայնագրի կնքմանը: Եթե ամեն ինչ լավ ընթանա, ապա բանակցությունը վերջնական տեսքի բերելը, ավարտելը լուրջ իրադարձություն կլինի 2017թ.-ին»,- ասաց դեսպանը՝ հավելելով, որ շրջանակային համաձայնագիրը կարող է նոր որակ հաղորդել ՀՀ-ԵՄ երկկողմ հարաբերություններին:
Սվիտալսկին արձանագրեց, որ 2016 թվականին նոր ռեկորդ սահմանեցին Բրյուսելից Հայաստան փոխանցված դրամական միջոցների առումով՝ շուրջ 62 մլն եվրո աջակցություն, որից մասնավորապես 7 մլն եվրոն հատկացվել է հաջորդ ընտրությունների նախապատրաստման համար:
ԵՄ դեսպանն ընդգծեց, որ 2017թ. ԵՄ համար գերակա ուղղությունը լինելու է ՀՀ ԱԺ ապրիլի 2-ի ընտրությունները, որը իրենց ուշադրության կիզակետում են գտնվելու:
