![](img/news/36/95/51/default.jpg)
Հայաստանի Հանրապետական կուսակցությունից նախկին վարչապետ Հովիկ Աբրահամյանի հեռանալն իր իրավունքն է: Այս մասին հունվարի 25-ին՝ լրագրողների հետ հանդիպման ժամանակ ասաց ԱԺ Հանրապետական խմբակցության պատգամավոր Մկրտիչ Մինասյանը:
Նրա խոսքով՝ անհրաժեշտ է ընդունել, որ քաղաքական գործիչն ազատ է իր քաղաքական գործունեությունը վարել, շարունակել կամ դադարեցնել: «Թե Հովիկ Աբրահամյանն ում հետ կհամագործակցի, իր գործունեությունը որ դաշտում կիրականացնի՝ ժամանակը ցույց կտա»,- նշեց Մինասյանը:
Ի պատասխան այն հարցին, թե ՀՀԿ-ում սպասելի՞ էր Հովիկ Աբրահամյանի նման քայլը, պատգամավորն ասաց. «Եթե ասեմ, որ դա սպասելի էր, ճիշտ չի լինի, եթե ասեմ, որ ընդհանրապես անսպասելի էր, դարձյալ ճիշտ չի լինի: Սա կյանք է, սա քաղաքականություն է»:
Հիշեցնենք, որ նախկին վարչապետ Հովիկ Աբրահամյանը երեկ հայտարարել է իշխող Հանրապետական կուսակցության շարքերը լքելու մասին: Ըստ որում՝ նախկին վարչապետը նշել է, որ կշարունակի քաղաքականության մեջ մնալ: